Qostanaıdaǵy tilsiz jaýdan zardap shekkenderge kómek kórsetý jáne qalpyna keltirý jumystarynda volonterler de belsendilik tanytýda. «Ulttyq volonterlik jeli» birlestigi jáne Birgemiz volonterler front-ofısiniń músheleri ádettegideı mańyzdy jumystardyń basy-qasynda júr.
«Ulttyq volonterlik jeli» birlestiginiń atqarýshy dırektory Tatıana Mıronıýktiń aıtýynsha, órtten zardap shekkenderge kómek kórsetý maqsatynda ár óńirde arnaıy shtab qurylǵan. Qostanaı qalasynyń ózinde volonterlerdiń kómegimen 18 gýmanıtarlyq kómekti qabyldaý beketi iske qosylǵan. Ol jerden órtten zardap shekken eldi mekenderge qajetti zattar jóneltilip turmaq.
Belgili bolǵandaı, qazirgi ýaqytta azyq-túlik pen kıim jetkilikti mólsherde jınalǵan. Áýlıekól aýdanyndaǵy gýmanıtarlyq kómekti qabyldaý pýnktteri tolyp, jan-jaqtan kelgen júk kólikteri Qostanaı qalasyndaǵy saqtaý oryndaryna jóneltilýde.
«Qostanaılyqtar barlyq volonterlerge úlken alǵystaryn bildirýde. Jastar qaısarlyǵymen jáne meıirimdiligimen tabıǵı apattan zardap shekken adamdarǵa barynsha qolushyn sozyp, memlekettik organ ókilderine járdemdesýde. Volonterler árdaıym qıyndyqqa tap bolǵan azamattarǵa kómektesýge daıyn. Qıyndyqty birge jeńemiz!», dedi Tatıana Mıronıýk.