Qarjy monıtorıng agenttigi Almaty qalasy boıynsha departamenti monsha kesheninde zańsyz astyrtyn oıynhana uıymdastyrǵan bir top adamǵa úkim shyǵardy, dep habarlaıdy Egemen.kz departamenttiń Telegram arnasyna silteme jasap.
Vedomstvo málimetinshe, alty adam zańsyz «Poker» oıyndaryn uıymdastyrǵan. Olar 22,5 mln teńgeden astam kiris jasaǵan.
«Jedel-izdestirý is-sharalaryn júrgizý kezinde mekemede oıynshylar, qyzmetshiler bolǵan. Olardan fıshka, karta jáne oıynnyń basqa da atrıbýttary tabylyp, tárkilendi. Sonymen qatar kazıno tekserilgen klıentter úshin ótý júıesin ornatqan», delingen habarlamada.
Sot aıyptalýshylardy túrli merzimge bas bostandyǵynan aıyrý týraly úkim shyǵardy.