Azamattyq avıasııa komıtetiniń tóraǵasy Lastaev Talǵat Katardyń avıasııalyq bıliginiń prezıdenti Mohamed Faleh ál-Hadjrımen jáne Katardyń Qazaqstan Respýblıkasyndaǵy Tótenshe jáne О́kiletti elshisi Abdýlazız Sultan Ál-Rýmeıhımen kezdesti, dep habarlaıdy Egemen.kz Indýstrııa jáne ınfraqurylymdyq damý mınıstrliginiń Telegram arnasyna silteme jasap.
Kezdesý barysynda taraptar azamattyq avıasııa salasyndaǵy ekijaqty yntymaqtastyq máselelerin, onyń ishinde Qazaqstan men Katar arasyndaǵy ushýlar sanyn odan ári arttyrý jáne ushý geografııasyn keńeıtý, avıasııa mamandaryn daıarlaý jáne olardyń biliktiligin arttyrý, Qazaqstanǵa Katar ınvestısııalaryn tartý máselelerin talqylady.
Sonymen, búginde Katardyń «Qatar Airways» áýe kompanııasy Doha – Almaty baǵyty boıynsha aptasyna 4 reıs jıiligimen turaqty jolaýshylar reısin oryndaıdy. Katar tarapynyń habarlaýynsha, Qatar Airways 2023 jyly kóktemgi-jazǵy navıgasııadan bastap Nur-Sultan men Doha qalalary arasyndaǵy reısterdi júzege asyrýdy josparlap otyr.
Taraptar sondaı-aq Qazaqstan Respýblıkasynyń azamattyq avıasııa salasynyń ókilderin daıarlaý jáne olardyń biliktiligin arttyrý máselelerin talqylady. Bul rette taraptar aǵymdaǵy jyldyń 27 qyrkúıegi men 7 qazany aralyǵynda ótetin Halyqaralyq azamattyq avıasııa uıymy (IKAO) Assambleıasynyń aldaǵy 41-sessııasyn talqylady.