El Prezıdenti Qasym-Jomart Toqaev bıyl Balalar jylyn jarııalaǵan bolatyn. Zamanynda Júsipbek Aımaýytov aıtqandaı, «balany buzýǵa da, túzeýge de sebep bolatyn bir shart – jas kúnde kórgen ónege» ekendigi de ras.
Oblys ortalyǵyndaǵy Bolashaq Saraiy mekemesi az ǵana ýaqyttyń ishinde ónegeli tárbıe men berik bilimniń oshaǵyna aınalyp úlgerdi. Sál taratyp aıtsaq, búginde sport, medıa, shyǵarmashylyq, ǵylymı-ıntellektýaldyq, IT baǵyttary boıynsha 3 500-den astam bala 130 túrli úıirmede ózderiniń júrek qalaýlary boıynsha balaýsa boılaryndaǵy bilimderimen búr jaryp kele jatqan qabiletterin jetildirip, alysty ańsap qanattanýda. Bir aıta keterligi, bala janyn baýrap, bolashaqtyń sara jolyn nusqaıtyn, aıaýly armandaryna qanat bitiretin úıirme jetekshileri joǵary bilimdi, óz mamandyqtarynyń naǵyz maıtalmandary. Bálkim istiń alǵa basýy da, ortaq murattyń oryndalýy da osydan shyǵar. Sózimizge dálel retinde shákirtterdiń az ýaqyt ishinde tolymdy tabysqa jetip, álemdik dodalarda top jarýyn aıtýǵa bolady. Bolashaq Saraiy uıymynda oqýshylar tek qana qosymsha bilim alýmen shektelmeıdi, olar jan-jaqty pikir almasyp, bilimderin búrlep, respýblıkalyq jáne halyqaralyq deńgeıdegi saıystarǵa qatysyp, shyǵarmashylyq shabyttarynyń shyraǵdanyn jaǵýda. Bir jaqsysy, peıili qulaǵan, bolashaqta ózderine qajet bolatyn mamandyqtaryn tańdaýǵa da baǵdar beredi. Qazir olar jandaryna jaqyn mamandyqtardyń qyr-syryn tereńnen zerttep, oqýǵa múmkindik alyp otyr. Radıo salasyn, kamera, dybys jazý, sýret salý tárizdi beıimdilikterin jetildirip, árqıly kórmeler men jarystarǵa qatysýda.
Oqýshylardyń dúnıe-tanymyn keńeıtip, oı-órisin damytýǵa kómektesetin aıryqsha mándi qundylyqtyń biri – kitap. Munda sońǵy tehnologııamen jabdyqtalǵan kitaphana bar. Bir jaqsysy, elektrondyq kitaphanada kez kelgen málimetti izdep, taba alasyz. О́zińiz qalaǵan ádebıetti júktep alýǵa da bolady. Aýdıo kitap tyńdaýǵa, qyzyqty kitapty qurbylarymen birge talqylaýǵa, sóıtip, kitap qazynasynyń tuńǵıyǵyna súńgýge mol múmkindik bar. Til jattyǵýlary, jyldam oqý máneri oı ushqyrlyǵyna baýlıdy. Ǵylymı-ıntellektýaldy baǵyttaǵy oqýshylar teorııany tájirıbe júzinde iske asyrady. Sońǵy úlgidegi tehnologııany paıdalana otyryp, turmystyq qaldyqtar men plastıkalyq zattarǵa ekinshi ómir syılaý múmkindigimen egjeı-tegjeı tanysady.
Balalarǵa bolashaqtyń baǵytyn beretin ystyq uıanyń múmkindigin aıta kele, alǵashqy nátıjeler týraly da sóz sabaqtaǵan jón. Mundaǵy shákirtter Reseı, Belarýs, Latvııa, Ázerbaıjan elderinde ótken baıqaýlardyń Gran-Prı ıeleri atandy. Osy arada aıta ketetin bir jaıt, jas tolqynnyń boıyndaǵy ulttyq ónerge degen umtylysy. Ilki zamannan beri ata-babalarymyzdyń jan serigi bolǵan ulttyq aspaptardy qaıta jańǵyrtyp, rýhanı kókjıegin keńeıtýge degen umtylys baıqalady. Dál osyndaı úıirmelerge baryp, babadan qalǵan jan seriginiń tinin jalǵastyramyz deıtin jastardyń kóbeıýi kóńilge qýanysh.
Deni saý urpaq qalyptastyrý baǵytynda qyrýar jumys atqarylýda. Arnaıy sporttyq alańdar uıymdastyrylyp, sporttyń negizgi túrleri úıretilýde. Oqýshylar dop oıyndarymen birge, jekpe-jek ónerlerin meńgerip, ulttyq oıyndarymyz asyq, toǵyzqumalaq, qazaqsha kúrespen aınalysyp, sheberlikterin shyńdaýda. Bolashaq Saraiy ashylǵaly tárbıelenýshiler barlyq salada eleýli jetistikterge jetýde. Sonymen qatar óńirdiń qoǵamdyq ómirine de belsene at salysyp, árqıly mádenı, áleýmettik, ǵylymı-praktıkalyq is-sharalardy ótkizýge qolǵabystaryn tıgizýde. Saraıdyń jas shákirtteri – «RoboOlımp» halyqaralyq baıqaýynyń jeńimpazy Talǵat Maqsat pen Euro Stars halyqaralyq óner festıvaliniń jeńimpazy Iаsmın Qýat qurbylaryna úlgi. Balalar jylynyń bastaýynda tuńǵysh ret ótkizilgen oblystyq JasSkills Aqmola-2022 chempıonaty uıymdastyryldy. Osy sharaǵa qatysqan 120-dan astam oqýshynyń bilimi men biliktiligine joǵary baǵa berildi. Tipti básekede top jarýdyń tamasha qýanyshyn aıtpaǵannyń ózinde tehnıkalyq, IT, ǵylymı baǵyttaǵy úıirmelerdiń bilim alýshylarǵa zor paıdasy bar ekenin ekshep kórsetýge bolar edi. Osy baǵytta talpynystary qanat jaıatyn bolsa, birer jyldyń tóńireginde jas kásibı maman bolyp qalyptasatyndyǵyna daý joq.
Balalar jylynyń aıasynda shyǵarmashylyq baǵyt boıynsha «Úkili dombyra» úıirmesi halyqaralyq óner baıqaýynyń, Bolashaq bı ansambli Qazmedıa ortalyǵynda ótken «Arena Tansev» halyqaralyq konkýrs-festıvaliniń, Diamond bı ansambli «Juldyzǵa qadam» halyqaralyq kópjanrly baıqaýynyń jeńimpazdary atanyp úlgerdi. Al «Juldyzdar» vokaldyq stýdııasynyń «úlgili» ataǵy, «Gúlder» halyq bı ansambliniń «halyqtyq» ataǵy taǵy bir márte rastaldy. Osynyń bári – úıirme jetekshileri men shákirtteriniń qajyrly eńbekteriniń jemisi.
Ult ustazy Ahmet Baıtursynulynyń 150 jyldyǵyna arnalǵan «Rýh sáýlesi – aqyn sózinde» atty alǵashqy oblystyq jas aqyndar aıtysy ótip, daryndardyń tanymy men parasatyn, bilimi men taǵylymdy tárbıesin, birligi men yntymaǵyn odan saıyn shyńdaı tústi.
Talaı baıraqty básekede des bermegen Bolashaq Saraiy-nyń jas balýany, Qazaqstannyń namysyn qorǵap júrgen, erkin jáne grek-rım kúresinen 3 dúrkin el chempıony Aldııar Baltashev Brazılııa elinde ótken sýrdolımpıadada grek-rım kúresinen qola júldeni qanjyǵasyna baılap, kók týymyzdy taǵy bir jelbiretip, sońynan ergen ini-qaryndastaryn qanattandyrdy, el mereıin asyrdy.
Ystyq uıa búginde bolashaqtyń sara jolyn salyp jatyr. El erteńine eleńdegen daryny mol balalar boılaryna bilim men bilikti sińirip, qaýlap ósip keledi.
KО́KShETAÝ