Jańa fılm túsirilimi aıaqtaldy

Qysqametrajdy fılm-debıýttiń túsirilimine bir apta ýaqyt ketti. Kıno­kartına Mádenıet jáne sport mınıstr­liginiń tapsyrysy boıynsha Ulttyq kınony memlekettik qoldaý ortalyǵynyń qoldaýymen «Qazaqfılm» kınostýdııasynda túsirildi. Jobaǵa 40-tan asa adam jumyldyrylǵan. Fılmde basty rólderdi tanymal akterler Dýlyǵa Aqmolda men Danııar Bektenov oınady.

Fılmniń basty keıipkeri 7 jasar Aıdar jergilikti kásipker Sáken men úı sharýasyndaǵy áıel Álııanyń jal­ǵyz uly. Oqıǵa jelisi ómirdiń árbir sát­terin, balalyq shaqtaǵy ǵajaıyp este­likterdi umyt qaldyratyn adam sanasy men oǵan qaıta aparar jol týrasynda órbigen. Qarapaıym oqıǵadan bastaý alatyn fılm, adam bolmysyndaǵy kishkentaı fılosofııany qozǵaıdy. Oqıǵa kórermenge adam onyń murasy emes, adam jadymyzdaǵy jarqyn estelik, al balalyq shaq – eshqashan qaıtyp kel­meıtin kezeń ekenin jetkizedi.

«Kartına shaǵyn bolsa da, shamaly kúnniń ishinde komanda bir-birine úırenip qaldy, joba úshin jumyla atsalysty. Árıne, prosess barysynda keıbir kútpegen qıyndyqtar týyndap jatty, biraq túsirilimge keri áserin tıgizbedi. Biz úshin eń qıynǵa soqqany trassa boıyndaǵy sahnalardy túsirý boldy. Soǵan qaramastan fılmniń qoıýshy operatory Mırhat Chapaı «Qazaqfılmniń» komandasymen birlese jaqsy jumys atqardy dep oılaımyn. Men úshin alǵash ret bala aktermen, úlken aktermen jumys isteý jańa tájirıbe boldy. Dýlyǵa aǵanyń túsirilim alańynda kóp kómegi tıdi. Akterlik quram bir-birine úırenisip ketken soń, kadrdaǵy kóńil kúı shynaıy shyqty dep oılaımyn», deıdi fılmniń ssenarıı avtory ári qoıýshy rejısseri Ińkár Kárim.

Bul jobaǵa deıin, jas rejısser jekemenshik qysqametrajdy fılm­der túsirip kelgen. Olardyń birazy kıno­festıvalderge qatysyp ta úlgerdi. Rejıs­serdiń aıtýynsha, «Mereke» fıl­miniń ssenarııiniń alǵashqy nus­qasy sál ózgeshe bolǵanymen, bas­ty ıdeıa joǵalmaǵan. Jaqyn arada shy­ǵar­mashylyq top kartınanyń montajdaý prosesine kirispek. «Fılmniń mon­tajdaý prosesine ýaqyt sozbaı kirisýi­miz qajet. Negizi mon­tajǵa deıin sanany sýytyp, materıal shamaly «dem alǵan» soń kirisken durysyraq dep oılaımyn. Alaıda alda áli dybys, tús óńdeý sııaqty kóptegen tehnıkalyq jumys kútip tur», dep tolyqtyrdy rejısser.

Qysqametrajdy «Mereke» fılm-debıýti kórermenge keler jyldyń basynda jol tartady. Aıta keteıik, «Mereke» debıýttik fılmi 2022 jylǵy 7-11 maýsym aralyǵynda ótken Ulttyq kınony qoldaý memlekettik ortalyǵynyń kezekti pıtchınginiń qorytyndysy boıynsha memlekettik qarjylandyrýǵa ıe boldy.