Búgin – Halyqaralyq jýrnalıster yntymaqtastyǵy kúni. Ataýly dataǵa baılanysty BAQ ókilderin Aqparat jáne qoǵamdyq damý mınıstri Darhan Qydyráli feısbýktegi paraqshasynda quttyqtady, dep habarlaıdy Egemen.kz.
«Bul ataýly kúnniń shyǵý tarıhy barshaǵa belgili dep oılaımyn. Jýrnalıstıka qaı zamannan qaýipti mamandyqtyń biri. Jýrnalıster árdaıym oqıǵalardyń ortasynda, túrli jaǵdaılardyń aldyńǵy shebinde júredi. Jurtshylyqqa jedel jańalyq jetkizý úshin jarǵaq qulaǵy jastyqqa tımeı jumys isteıtin áriptesterimizdiń keıde ómirine qater tónetin sátter de kezdesedi.
Jalpy bizdiń elimizde medıa ókilderi ózara yntymaqpen jumys isteıdi, bir-birin qoldap júredi. Bul – jaqsy úrdis. Tıisinshe memleket jýrnalısterdiń zańdy kásibı qyzmetin qorǵaıdy ári áriptesterdiń kedergisiz jumys isteýi úshin quqyqtyq kepil bolý jaǵyn qarastyrady.
Máselen, Qazaqstanda jýrnalıske qoǵamdyq mańyzdy maqsattar úshin is atqaratyn adam retinde, kásibı qyzmetin júzege asyrýyna baılanysty onyń ar-namysyn, qadir-qasıetin, ómirin, densaýlyǵyn jáne múlkin qorǵaýǵa kepildik beriledi», dep jazdy D.Qydyráli.
Osy oraıda ol mınıstrlik básekege qabiletti buqaralyq aqparat quraldaryn damytý, jýrnalısterdiń quqyǵyn qorǵaý baǵytynda biraz jumys atqaryp kele jatqanyn aıtty.
«Búgin «Ádil sóz» jáne Gennadıı Bendıskıı qory «Jýrnalıster táýelsizdik jáne qaýipsizdik úshin» atty dóńgelek ústel ótkizip jatyr. Bizdiń mınıstrlik is-sharany birge uıymdastyrdy. Memleket múddesi jolynda qyzmet ete bereıik, áriptester!», dep jazdy mınıstr.