Bıikten qoryqpaıtyn boıjetken

Keıde bir bıik baǵananyń basyna shyǵyp, elektr symdaryn jalǵap jat­qan elektr monterlerin kóresiz. Kóz kór­genmen, kóńil toqtaı bermeıdi. Úı­ren­­shikti dúnıe esebindegi jaıt. Túptep kelgende, qıyndyǵy da az emes. Arnaıy ruqsat kerek. Mamandyqty ıgerý úshin kásibı sheberlik qana emes, erik-jiger de qajet bolatyn bolar. Siz ben biz kórgen baǵana basyna shyǵatyn elektr monterleri negizinen er adamdar. Al boı­jetkender sırek. Tipti joq bolýy da yqtımal.

Ekaterına Vladımırovna Qara­ǵan­dy oblysynyń týmasy eken. Sóı­les­ken kezimizde bıiktikke degen qush­tar­­lyqtyń boıynda bala jasynan bar ekenin aıtady. Bálkim, osy bir batyldyq ata-anasynan juqqan bolýy kerek. Anasy Lılııa Leonovna – qu­ry­lys jáne kópir krandarynyń ma­shınısi. Beınelep aıtqanda, qus qanaty talatyn bıikke shyǵyp, záýlim úılerdiń qurylysyn júrgizip, arqalyǵy aspan tiregen kópirlerdi salýǵa úles qosty. 1987 jyly «Elektr monteri» ma­mandyǵyn ıgerip, Qaraǵandydaǵy Aqjal kentindegi podstansaǵa kezekshi elektr monteri bolyp ornalasady. Al ákesi Vladımır Petrovıch áýe kúshteri bóliminde qyzmet atqarǵan. Jórgeginen demesek te, es bilgeli ata-anasynyń ma­man­dyqtarynyń qyr-syryn janyna jaqyn tutyp ósken qyz Shýchınsk joǵary tehnıkalyq kolledjine oqýǵa túsip, 2014 jyly elektr mehanıgi mamandyǵyn alyp shyqqan. Tipti orta arnaýly oqý ornynda oqyp júrip, «Sanatornaıa» podstansasynda kezekshi elektr monteri bolyp eńbek etti. Arada eki jyl ótken soń Shýchınsk qalalyq elektr jelileri kásipornyna oralyp, mamandyǵy boıynsha jumys is­teı­di. Bıiktikte jumys isteý jónindegi sy­naqtan múdirmeı ótken.

– Árıne, júrek qobaljıtyn tus­tary da bolady, – deıdi Ekaterına Vladımırovna. – Eń bastysy, ózińniń qo­lyń­nan keletinine kámil senýiń kerek. Qazir men úshin úırenshikti jaǵdaı tárizdi. Tosynnan kórgen talaılardyń tańyrqaı qaraǵany qyzyq bolyp kórinedi. Eger menen «osy mamandyqty qalaı qaladyń?» dep surasa, «meniń anam – energetık» dep maqtanyshpen jaýap beremin.

Bıik baǵananyń basynda batyl boıjetken jumys istep jatqanda, jerdegi árip­testeri qurmeti men qoshemetin aıamaıdy. О́ziniń aıtýyna qaraǵanda, jumystan qoly qalt etse, tabıǵat aıasynda bolǵandy jaqsy kóredi. Al alpınızmmen aınalysý – armany. Taý-tasty aralap, bıikke shyqqan qandaı jaqsy!

– Býrabaıdyń bıiginen qaraǵanda, kóz jeter jer tup-týra alaqanyńdaǵydaı kórineri bar, – deıdi Ekaterına Glýshkova. Átteń ýaqyt tapshy. Sonda da Oq­jet­pes­tiń oń ıyǵynan kórkem dalaǵa kóz sala­myn. Osy kógildir munar­ǵa maly­nyp, kóz ushynda kók saǵym oınaıtyn kókpeńbek dala kósilip jat­qan­da kóki­re­gińe týǵan jerge degen súıis­pen­shilik sezimi quıylady. Biz elektr jeli­leriniń múltiksiz jumys isteýin qam­­tamasyz etip, ǵajaıyp ólkeniń shamyn jaǵyp júrmiz. Odan artyq qýanysh bolar ma?!

Shýchınsk qalalyq elektr jelileri kásipornynda keıipkerimizdi «bıiktikten qoryqpaıtyn boıjetken» dep ataıdy. Bir aýyz sózdiń astarynda qurmet pen qoshemet bógip jatqandaı. Aıtsa aıt­qan­daı-aq qoı!

Aqmola oblysy,

Býrabaı aýdany