Úkimet basshysynyń orynbasary Gúlshara Ábdihalyqova bastaǵan delegasııa Shyǵys Qazaqstan oblysyna jumys saparymen keldi. Bilim jáne ǵylym mınıstri Aslan Sárinjipov, Eńbek jáne halyqty áleýmettik qorǵaý mınıstri Tamara Dúısenova jáne Parlament depýtattary bar delegasııa óńirdegi birqatar kásiporyndar men kolledjderde, mektepterde, balalar shyǵarmashylyǵy saraıynda, etnoaýylda bolyp, «Altaı» tehnoparkinde ótken «Tehnıkalyq jáne kásiptik bilim berýge dýaldy oqytý júıesin engizý jumysynyń tájirıbesi» atty III respýblıkalyq forýmǵa qatysty.
Aldymen «Azııa-Avto» kásipornynda bolǵan Úkimet músheleri dýaldy oqytý júıesi boıynsha kásiptik bilim beretin oqý oryndarymen baılanysqa nazar aýdardy. О́tken jyly kásiptik-tehnıkalyq oqý ornynyń 200-den astam túlegi zaýytqa jumysqa ornalasqan. Qazir 42 jas óndiristik tájirıbeden ótýde. Al jalpy bilim beretin №11 mektepte kásiptik baǵdar páni 1-synyptan bastap júrgiziledi.
Vıse-premer G.Ábdihalyqova Elbasy N.Nazarbaevtyń Qazaqstan halqyna Joldaýynda dýaldy bilim berýge aıryqsha nazar aýdaryp, el ekonomıkasyna sapaly mamandar daıarlaý mindettegenin atap ótti. G.Ábdihalyqovanyń aıtýynsha, aldaǵy ýaqytta dýaldy oqý 50 paıyzǵa deıin artyp, mamandardy óndiriste kóbirek oqytýǵa mán beriletin bolady.
Jalpy, Shyǵys Qazaqstanda dýaldy oqytý tájirıbesi eki jyl buryn qolǵa alynǵan. Muny óńirdegi kolledj shákirtteriniń óndiris oryndaryna kóptep jumysqa alynýynan baıqaýǵa bolady. Máselen, kóp salaly tehnologııalar kolledji «Jol kartasy-2020» baǵdarlamasy boıynsha sońǵy bes jylda 1079 maman daıarlaǵan. Qurylys kolledjiniń stýdentteri sońǵy oqý kýrsyn óndiriste ótkizýde. Byltyr barlyq túlektiń 82 paıyzy jumysqa ornalasqan. Kásiptik bilim alǵan jastar «KEMONT», «Promtehmontaj», «Azııa-Avto», «Vostokpromelektromontaj» kásiporyndarynda jumys istep júr. Atalǵan oqý ornynda germanııalyq agenttikpen birlesken baǵdarlama júzege asyrylýda.
Bilim jáne ǵylym mınıstri A.Sárinjipov Shyǵys Qazaqstannyń dýaldy oqytý júıesinde mol tájirıbesi bar ekenin, ony ózge óńirlerge engizý josparlanyp otyrǵanyn jetkizdi. Al Eńbek jáne halyqty áleýmettik qorǵaý mınıstri T.Dúısenova О́skemendegi tirek qımylynda kemistigi bar balalarǵa arnalǵan ońaltý ortalyǵynda bolyp, úkimettik emes uıymdardyń ókilderimen júzdesti. Kezdesý barysynda mınıstr kembaǵal jandardyń quqyǵyn qorǵaýǵa baǵyttalǵan zańnamany jetildirý, olardy oqytý, jumysqa ornalastyrý máseleleri boıynsha saýaldarǵa jaýap berdi. Múgedekterdi oqytý-óndiristik kombınaty qanatqaqty jobasyn qoldaıtynyn bildirgen mınıstr Shyǵystyń múmkindigi shekteýli jandarǵa qamqorlyq jasaýda jetekshi óńirge aınalǵanyn atap ótti.
«Altaı» tehnoparkinde ótken respýblıkalyq forýmda tehnıkalyq jáne kásiptik bilim berýdiń shyǵysqazaqstandyq úlgisi týraly birqatar jobalar nazarǵa usynyldy.
– Indýstrııalandyrýdyń júzege asyrylýy aldymen ónerkásip oryndaryna baılanysty desek, kásiporyndardyń damýy tehnıkalyq jáne kásiptik bilimi bar bilikti mamandarǵa táýeldi. Aıtalyq, Avstrııa, Belgııa, Nıderlandyda oqýshylardyń 70 paıyzy jumysshy mamandyǵyn meńgeretin bolsa, Germanııa, Shveısarııa, Norvegııa, Shvesııa elderinde bul kórsetkish 60 paıyzdy quraıdy. Iаǵnı, damyǵan eýropalyq memleketterde jumysshy mamandyqtaryna kóńil bólinedi. Al elimizde kásiptik-tehnıkalyq mamandyqtardy tańdaýshylar qatary 10 paıyzdan áreń asady. Sondyqtan dýaldy oqytý júıesin engizý boıynsha qanatqaqty jobany sátimen júrgizgen Shyǵys Qazaqstan oblysynyń tájirıbesin negizge ala otyryp, problemany sheshýge kirisýimiz qajet, – dedi Premer-Mınıstrdiń orynbasary.
Prezıdent tapsyrmasyna sáıkes, oqytýdyń dýaldy júıesin engizýdiń ulttyq modelin qalyptastyrý men memleket ekonomıkasynyń ınnovasııasyna bilikti kadrlar daıarlaýdyń mańyzdylyǵyna toqtalǵan aımaq basshysy B. Saparbaev bul forým keıingi eki jylda oblysta qolǵa alynǵan oqytýdyń dýaldy júıesin engizý boıynsha qanatqaqty jobanyń nátıjeli júzege asyrylýyna yqpal etip, ónerkásip pen oqý oryndarynyń arasyndaǵy baılanysty nyǵaıta túsýge qosymsha serpin beredi degen senimdemiz, dedi.
Forým barysynda Eńbek jáne halyqty áleýmettik qorǵaý mınıstri T.Dúısenova, Bilim jáne ǵylym mınıstri A.Sárinjipov baıandama jasap, taqyrypty tarqata tústi. Ulttyq kásipkerler palatasy basqarma tóraǵasynyń orynbasary N.Áltaev kadr daıarlaýdaǵy memleket pen bıznestiń ózara qarys-qatynasyn damytýdyń bolashaǵy, Serebrıanka tehnologııalyq kolledji dırektorynyń mindetin atqarýshy O.Antonenko «Buqtyrma sement kompanııasy» Qazaqstan-Germanııa birlesken kásipornymen dýaldy oqytý júıesin júzege asyrý týraly jumystaryn jetkizdi. Sheteldik sarapshylar da dýaldy oqytý júıesiniń zamanaýı erekshelikterin atap ótti. Olardyń qatarynda TVET UK atqarýshy dırektory Metıý Anderson, GIZ Qazaqstandaǵy ókildiginiń jetekshisi Raıner Gerts, Reseıdiń Petrozavodsk qalasyndaǵy bıýdjettik monıtorıng ortalyǵy dırektorynyń orynbasary Svetlana Sıgova bar.
Dýman ANASh,
«Egemen Qazaqstan».
Shyǵys Qazaqstan oblysy.