The Richest saıtynda álemniń eń baqýatty kásipqoı boksshylarynyń tizimi jarııalandy. Úzdik ondyqtyń tizimine Qazaqstannyń eń ataqty sportshysy Gennadıı Golovkın enbeı qalǵan eken.
Dáýleti tasyǵan boksshylar kóshin Floıd Meıvezer bastap tur. 45 jastaǵy AQSh-tyń arlany 1996 jyly Atlanta Olımpıadasynda qola medaldy ıelengennen keıin kásipqoı rıngte kúsh synasýǵa bel býdy. Sol aralyqta ótkizgen 50 básekeniń barlyǵynda jeńiske jetip, 27 qarsylasyn nokaýtqa jiberdi. Birneshe salmaq dárejesi jáne birneshe beldi nusqa boıynsha chempıondyq belbeýdi ıelengen Meıvezer HHI ǵasyrdyń eń úzdik boksshysy dep tanyldy. Onyń ár jekpe-jekten túsken tabysy ózge sportshylardyń túsine de kirgen emes. Búgingi tańda Floıd 450 mıllıon AQSh dollaryna ıelik etip otyr.
Ekinshi orynda – Djordj Forman. Kásipqoı rıngtegi karerasyn amerıkalyq alyp sonaý 1969 jyly bastady. Ol kezde Djordj julqynyp turǵan 20 jasta edi. Al sońǵy jekpe-jegin 48 jasynda ótkizdi. 1997 jyldyń kúzinde «shaý tartqan» ardager boksshy 26 jastaǵy otandasy Shennon Brıgske upaı sanymen ese jiberdi. Biraq Forman sol sátsizdikke bola qaıǵy-muńǵa salynǵan joq. Ol rıngte jeńilis tapqanymen, materıaldyq turǵydan mol oljaǵa keneldi. Kezinde Muhammed Álı, Djo Freızer, Evander Hollıfıld, Maıkl Mýrer syndy attary ańyzǵa aınalǵan azamattarmen aıqasqan «Dáý Djordjdyń» tabysy – 300 mıllıon dollar.
Úzdik úshtikti Mennı Pakıao túıindep tur. Fılıppınniń maqtanyshy ári atymtaı jomart atanǵan áıgili bylǵary qolǵap sheberi 220 mıllıondy enshilep otyr. Sondaı-aq TOP-10 baqýattylardyń tizimine myna boksshylar endi: Oskar De La Hoııa (200 mıllıon), Saýl Alvares (180 mıllıon), Lennoks Lıýıs (150 mıllıon), Shýgar Reı Leonard (120 mıllıon), Vladımır Klıchko (90 mıllıon), Entonı Djoshýa (80 mıllıon) jáne Vıtalıı Klıchko (80 mıllıon).