Amanat partııasynyń «Jastar rýhy» jastar qanaty jasaqtaǵan volonterlik toptar Qostanaı oblysynda orman órtinen zardap shekken jáne evakýasııalanǵan turǵyndarǵa kómek kórsetip, belsendi jumysyn jalǵastyryp keledi.
Partııanyń Qostanaı oblystyq fılıalynyń aqparaty boıynsha, 5 kúnde amanattyqtar Amanqaraǵaı, Ozernoe jáne Basaman aýyldarynda zardap shekken 731 otbasyna birinshi kezekte qajetti zattar men azyq-túlik jetkizdi. Jalpy alǵanda, 270 tonna gýmanıtarlyq kómek taratyldy. Bul jumystyń barlyǵyn eriktiler atqarýda. «Jastar rýhy» jastar qanatynyń Aqmola oblystyq fılıalynyń tóraǵasy Sultanbek Bekeshevtiń aıtýynsha, volonter bolý – qoǵamǵa paıda ákelý degen sóz. «Kóp adam jalaqy tólenbeıtin jumysqa janyńdy salyp kirisýdiń ne keregi bar dep oılaıdy. О́mirde bári aqshamen ólshenbeıdi. Munda eresekter men balalardyń júzinen qarapaıym rızashylyqty baıqaımyn», dedi ol.
Alaıda mundaı jumysty uıymdastyrý ońaı emes. Júıeli jumys tártibin qalyptastyrý qajet. Mine, osy maqsatta Maqtaaral aýdandyq máslıhatyndaǵy Amanat partııasynyń depýtaty Súndet Kenjebaev Áýlıekól aýdanyna volonter retinde keldi. «Aýdanymyzda sý tasqyny bolǵan kezde elimizdiń túkpir-túkpirinen eriktiler jınaldy. Sol tusta úılestirýshilerdiń biri boldym. Sebebi mundaı jaǵdaıda gýmanıtarlyq kómekten bólek, adamı resýrsty tıimdi paıdalaný mańyzdy. Osy tájirıbeni qostanaılyqtarmen bólisip jatyrmyz», dedi ol.
«Jaqynyna kómekke umtylǵan adam qaýip-qater týraly oılanbaıdy», deıdi Aldııar Jumabaı esimdi volonter. Sonyń dáleli – Qostanaı oblysyndaǵy tabıǵı órt. «Zardap shekkenderge kómek kórsetip jatqanymyzǵa birneshe kún boldy. Qazaqstannyń túkpir-túkpirinen júk kólikteri kelip jatyr. Onda tıelgen zattardy túsirip júrmiz. Bir oqıǵa meni erekshe tańǵaldyrdy. Kórshileri bir ájeniń úıin sóndiremiz dep júrgende óz baspanalary órtenip ketipti. Qarııanyń úıi din-aman. Otandastarymyz ózgeniń basyna túsken qıynshylyqqa beıjaı qarap otyra almaıdy», deıdi Aldııar.
Al «Jastar rýhynyń» belsendisi Jaına Álimova bolsa, volonter bolý áıel zatyna jat degen túsinikti joqqa shyǵaryp júr. «Árıne, 50 kılo tartatyn bir qap undy kótere almaımyn. Alaıda qyzdar kelgen zattardy suryptaýǵa kómektesip júr. Sebebi azyq-túlikti, taýarlardy birkelki taratý kerek. Sondaı-aq gýmanıtarlyq kómektiń jalpy esebin júrgizemiz. Táýlik boıy osyndamyz. Osy jerde túneımiz», dedi ol.
Qalpyna keltirý jumysyna Túrkistan oblysynyń volonterleri de qosyldy. «Arys pen Maqtaaraldaǵy oqıǵalar kezinde zardap shekken adamdarǵa kómektestik. Sol kezde oblysymyzǵa elimizdiń túkpir-túkpirinen eriktiler kelip, qalpyna keltirý jumysyna atsalysty. Birinshi kezekte qajetti azyq-túlik jiberdi. Tabıǵı órt týraly estigen kezde volonterler tobyna qosylý úshin birden «Jastar rýhymen» baılanysqa shyqtym. Jaǵdaıdy óz kózimmen kórip, zardap shekken adamdarmen júzdesken soń «Qostanaılyqtar – biz sizdermen birgemiz!», degim keledi», dep atap ótti Oljas Mamyr esimdi belsendi.
«Jastar rýhy» jastar qanatynyń tóraǵasy Nurjan Jetpisbaevtyń málimdeýinshe, Áýlıekól aýdanyna elimizdiń túkpir-túkpirinen 300-den astam erikti jınalǵan.
«Volonterler gýmanıtarlyq kómekti qoımalarǵa jaıǵastyrdy. Azyq-túlik pen qajetti zattardy turǵyndardyń úılerine jetkizip berýde. Zardap shekkender men evakýasııalanǵandarǵa jyly sózimizdi aıtyp, moraldyq qoldaý kórsetý de mańyzdy. Bul – bizdiń shynaıy janashyrlyǵymyzdy bildirý ǵana emes, sonymen birge olarǵa qıyn sátte kúsh-jiger berý. Sonymen qatar jastar qalpyna keltirý jumystaryna, órtten keıingi úıindilerdi suryptaýǵa, aýmaqty tazalaýǵa jumyldyrylǵan. Munymen qosa biz órtten zardap shekpegen, biraq qoldaýdy qajet etetin kópbalaly jáne az qamtylǵan otbasylarǵa da azyq-túlik taratamyz», dedi N.Jetpisbaev. Sondaı-aq ol qazir turmystyq tehnıka men qurylys materıaldary kóbirek kelip jatqanyn aıtty.
Volonter Raıymbek Baqytjanov Qostanaı oblysyna elordadan kelgen. Ol apat týraly estı sala birden erikti retinde barýǵa sheshim qabyldaǵanyn aıtty.
«Júk tıelgen kólikter saǵat saıyn kelip jatady, uıyqtamaı, demalmaı jumys isteýge týra keledi. Biraq erikti bolýdyń basty qasıeti de osy. Sebebi biz adamdarǵa naqty ispen kómektesemiz. Sondyqtan múmkindigim bola salysymen osynda esh oılanbastan keldim. Biz munda kómek, qoldaýymyz qansha qajet bolsa, sonsha ýaqytqa deıin jumys isteımiz», dedi ol.
Jergilikti turǵyn Amanjol Ahmetov eriktilerge alǵysyn aıtyp, eń bastysy, elimizde tynyshtyq bolsyn degen tilegin jetkizdi.
«Búkil Qazaqstan halqy bizge kómektesip jatyr. Azyq-túlik tapshylyǵy joq, bizge qajettiniń bárin ákeldi. Bul órt qazaqstandyqtardyń qıyn sátte bir-birine kómektesýge ázir janashyrlyǵyn kórsetti», dedi ol.
Buǵan deıin Parlament Májilisindegi partııa depýtattary Dınara Zákıeva, Amanjol Áltaı jáne partııa hatshysy Rınat Kertaev Qostanaı oblysynda órtten zardap shekkenderdiń jaǵdaıyn surap baryp, órt sóndirýge jumyldyrylǵan qyzmetkerlerimen júzdesken bolatyn. Sondaı-aq Amanqaraǵaı, Lesnoe jáne Novonejınka aýyldarynyń balalaryna partııanyń jyl saıynǵy «Balany mektepke daıarlaıyq!» aksııasy aıasynda mektep formasy, oqýlyqtar, rıýkzaktar jáne keńse taýarlary bar jıyntyqtar tabystaldy.
Eske sala keteıik, amanattyqtar zardap shekkenderge 1 200 tonnadan astam gýmanıtarlyq kómek jınady. Partııa fılıaldary janyndaǵy gýmanıtarlyq kómek jınaý pýnktteri elimizdiń barlyq 20 óńirinde jumys isteıdi. Amanat partııasy Ortalyq apparatynyń ujymy da zardap shekkenderge kómek kórsetý qoryna birkúndik jalaqysyn aýdardy.