Elordadaǵy «Barys Arena» sport kesheninde «We are the world» atty jastarǵa arnalǵan mýzykalyq qaıyrymdylyq festıvali ótti. Mádenı is-shara Álemdik jáne dástúrli dinder lıderleriniń VII sezi aıasynda uıymdastyryldy. Joba ulttyq qundylyqtardy qoldaý jáne ilgeriletýdi kózdeıdi. Bul VII sezdiń beıbitsúıgishtik, tatýlyq pen birlikti dáripteý mıssııasymen úndes ekenin atap ótken jón.
Is-shara barysynda Senat Tóraǵasy, sezd Hatshylyǵynyń basshysy Máýlen Áshimbaev festıvaldy uıymdastyrýshylar men qatysýshylarǵa alǵysyn bildirdi. Senat Spıkeri konserttik baǵdarlamanyń «We are the world» dep atalýy sımvolıkalyq mánge ıe ekenin aıtty. Sondaı-aq ol dinaralyq jáne órkenıetaralyq dıalogtyń alańyna aınalǵan Álemdik jáne dástúrli dinder lıderleriniń VII seziniń tarıhı mańyzyna toqtaldy.
«Aldaǵy sezd biregeı jáne tarıhı mańyzǵa ıe. Oǵan qazirgi tańdaǵy asa kórnekti dinder lıderleri qatysady. Forýmda qazirgi jaǵdaıda beıbitshilikti, yntymaqtastyqty jáne dıalogty nyǵaıtý máseleleri talqylanady dep josparlanyp otyr», dedi Máýlen Áshimbaev.
Sonymen qatar Senat Spıkeri qazaqstandyq damý úlgisiniń biregeıligine jáne durys qundylyqtardy dáripteýdegi jastardyń róline nazar aýdardy.
«Qazirgi tańda dúnıejúzi bizdiń elimizdi álemdik qoǵamdastyqtyń belsendi múshesi retinde tanıdy. Elimizde 100-den astam etnos ókilderi tatý ómir súrýde. Sondyqtan Qazaqstan beıbitshiliktiń mekeni dep aıtýǵa tolyq negiz bar. Búgingi festıvaldyń mánin «Qazaqstandyq jastar beıbitshilikti qoldaıdy» degen sózben sıpattaýǵa bolady. О́nerli jastarymyz elimizde beıbitshilik pen kelisimdi ári qaraı damytýǵa óz úlesterin qosa beredi dep senemiz», dedi Máýlen Áshimbaev.
Is-shara barysynda Ninety One, Orynkhan, Tamiris, Darkhan Juzz, Qonyratbay fam, MAKVIN, Marhaba Sábı, Drummattack, DJ Puza jáne taǵy basqa otandyq ánshiler óner kórsetti.
Aıta ketken jón, mýzykalyq festıvaldan túsken qarajat Qostanaı oblysyndaǵy tabıǵı órtten zardap shekkenderge kómek kórsetý úshin ashylǵan qaıyrymdylyq qoryna jiberiledi.