Ústimizdegi jyldyń 21-23 mamyry kúnderi Astanada BUU-nyń qoldaýymen VII Astana ekonomıkalyq forýmy (AEF) men II Daǵdarysqa qarsy dúnıejúzilik konferensııa (DQDK) ótkizilmek. Osy oqıǵaǵa baılanysty keshegi kúni atalǵan forýmdy uıymdastyrý isine belsene qatysyp júrgen Parlament depýtaty Serik Nógerbekov Ortalyq kommýnıkasııalar qyzmetinde jýrnalıstermen júzdesip, ázirlik jumystary jaıynda áńgimelep berdi.
S.Nógerbekovtiń aıtýyna qaraǵanda, bul forým Qazaqstan Respýblıkasynyń Prezıdenti Nursultan Nazarbaevtyń bastamashylyǵymen 2008 jyldan bastap jumys istep keledi. Sodan beri ony ár jyl saıyn ótkizip otyrý dástúri berik qalyptasty. Osy ýaqytqa deıin álemniń eń basty problemalaryn qamtyǵan 6 forým bolyp ótti. Sońǵy 2013 jyly ótken 6-shy forýmdy «G-Global» formatynda teńdestirilgen ekonomıkalyq damýdy qamtamasyz etý taqyryby qarastyrylǵan bolatyn. Bul forýmǵa 136 memleketten 12 myńnan asa qatysýshy jınalǵan edi.
Endi aldaǵy ótetin forým jumysyna kelsek, ol kóptegen máselelerdi qamtymaq. Sonyń ishinde álemdik ekonomıkany damytý boıynsha usynystar ázirlenbek. Sondaı-aq, úlken jıyrmalyq sammıtine, ol elderdiń basshylaryna jáne óńirlik uıymdardyń jetekshilerine álemdik ekonomıkany damytý boıynsha joǵarydaǵy usynystardy qamtyǵan ashyq hat arnaý josparlanýda.
Sonymen qatar, bul ótetin forýmnyń taǵy bir ereksheligi – onda álemdik daǵdaryspen kúres josparynyń tujyrymdamasy qabyldanýy tıis. Sonymen qatar, osy forým aıasynda elimizge ınvestısııa tartý jóninde arnaıy shara ótkiziletin bolady. Basqa da mańyzdy máseleler qamtylmaq.
– Bul forýmnyń taǵy bir ereksheligi – onda EKSPO-2017-ni ótkizý jóninde arnaıy basqosý uıymdastyrylyp, sonda elimizde ótetin búkilálemdik kórmeni nasıhattaý máseleleri qarastyrylmaq. Jalpy, forým jumysyna 10 myńnan astam adam qatysady dep kútilýde. Sońǵy ýaqyttary Astana ekonomıkalyq forýmy men osy forým aıasynda ótkizilip kele jatqan «G-Global» jobasynyń mańyzy halyqaralyq deńgeıde arta túskendigi anyq baıqalyp otyr. Bul jobanyń BUU Bas Assambleıasynyń qoldaýyna ıe bolyp, tıisti qaýly qabyldanǵandyǵy sonyń bir kórinisi dep bilemiz, – dedi óz sózinde S.Nógerbekov.
Astana ekonomıkalyq forýmy álemdik sarapshylar qoǵamdastyǵy kóshbasshylarynyń, álemdik saıasat, bıznes, iri halyqaralyq uıymdar men transulttyq kompanııalar ókilderiniń, Nobel syılyǵynyń laýreattarynyń jáne kórnekti ekonomıst ǵalymdardyń qatysýymen ótkiziletin shara ekendigi belgili. Demek, forým alańy álem boıynsha alǵanda qısyndy oılar men ómirsheń ıdeıalardyń óris alatyn mekenine aınalyp kele jatqandyǵy anyq.
S.Nógerbekov óz sózinde osy joly ótetin ekinshi Daǵdarysqa qarsy dúnıejúzilik konferensııa jumysyna da erekshe mán berip ótti. Onyń aıtýynsha, bul jobany 2011 jyldyń 15 jeltoqsan kúni Qazaqstan Prezıdenti Nursultan Nazarbaev ilgeriletken bolatyn. Birinshi joly ótkizilgen konferensııada Álemdik daǵdarysqa qarsy jospardyń basty baǵyttary kórsetilgen Astana deklarasııasy qabyldanǵan edi. Al ekinshi konferensııa jumysy ústimizdegi jyldyń 2 mamyry kúni ótken Azııa damý banki Basqarýshylar keńesiniń 47-shi otyrysy aıasyndaǵy plenarlyq sessııadan bastaý alǵan bolatyn. Qorytyndysy Astana ekonomıkalyq forýmy aıasynda túıindelmek. Oǵan kóptegen elderdiń qarjy-ekonomıkalyq mınıstrleri, BUU-ǵa múshe memleketterdiń ortalyq bankteri jetekshileri qatysady dep kútilýde. Bul sharanyń aıasynda Álemdik daǵdarysqa qarsy jospardyń tujyrymdamasy da qaralatyn bolady.
Suńǵat ÁLIPBAI,
«Egemen Qazaqstan».