Senat Tóraǵasy Qasym-Jomart Toqaev BUU-nyń Bosqyndar isteri jónindegi Joǵarǵy komıssar Basqarmasynyń Ortalyq Azııadaǵy Aımaqtyq ókili Bernard Doıldi onyń ótinishi boıynsha qabyldady, dep habarlady osy palatanyń baspasóz qyzmeti.
Palata Tóraǵasy B.Doıldi Aımaqtyq ókil laýazymyna taǵaıyndalýymen quttyqtady jáne jumysynyń tabysty bolýyna tilektestigin bildirdi.
Q.Toqaev atap ótkendeı, kúrdeli geosaıası jaǵdaıdy eskere kelgende, BUU BJKB-nyń Ortalyq Azııadaǵy qyzmeti erekshe mańyzdy. Onyń pikirinshe, zańsyz kóshi-qonmen jáne bosqyn mártebesin asyra paıdalanýmen kúres ózekti bolyp otyr.
«Qazaqstandyq parlamentshiler BUU BJKB-nyń qyzmetine jan-jaqty kómektesýge ázir», dep atap ótti Q.Toqaev. Birikken Ulttar Uıymynyń maqsattaryna qol jetkizý jáne ornyqty damýdy qamtamasyz etý boıynsha mindetterdi oryndaýda Qazaqstan BUU júıesindegi uıymdarmen belsendi yntymaqtastyqqa múddeli, dedi Senat Tóraǵasy.
Q.Toqaev BUU qyzmetkeriniń nazaryn aldaǵy ýaqytta bolatyn Astana ekonomıkalyq forýmyna jáne Daǵdarysqa qarsy dúnıejúzilik konferensııaǵa, sondaı-aq, AО́SShK-niń Shanhaıdaǵy kezekti Sammıtine aýdardy. Qazaqstannyń bastamasy boıynsha ótetin bul forýmdar jáne basqa da syrtqy saıası sharalar bizdiń elimizdiń halyqaralyq bedeli arta túskenin kórsetedi.