Bıyl Ekinshi dúnıejúzilik soǵystyń aıaqtalǵanyna 77 jyl, keńes-aýǵan soǵysynyń aıaqtalǵanyna 33 jyl toldy. Gıtlerlik Germanııamen bolǵan soǵysta qan keshken jaýyngerler osy kúni ǵasyr ǵumyrǵa taıasa, aýǵan dalasynda maıdandasqan sarbazdardyń aldy alpysty alqymdap, arty qyryqtyń qyrqasyna shyǵyp otyr.
Keńes ókimeti qulamaı turǵanda bolǵan soǵystar týraly jurttyń pikiri ártúrli. Alaıda maıdanǵa attanǵan jigitter men qyzdardyń eshqaısysy basqynshy bolmaǵany anyq. Olar Otan aldyndaǵy boryshtaryn úlken táýekelmen ótedi. Soǵysta aýyr jaraqat alyp, ómiriniń sońyna deıin múgedek bolyp ǵumyr keship jatqandardyń qarasy az emes.
Osy eki ardagerler tobyna qurmet kórsetý maqsatynda Almaty qalasy Qoǵamdyq damý basqarmasy men Social project management ortalyǵy jyl boıy birqatar jumys atqardy. «Azamattyq borysh» dep atalatyn jobanyń aıasynda qaladaǵy ortalyq zıratta jerlengen ardagerlerdiń qabirleriniń aınalysyna jóndeý jumystaryn júrgizdi. Munda ardagerler jerlengen zırattardyń naqty sany belgisiz, olar shoǵyrlana kómilgen úsh oryn bar.
Ortalyq ókilderi jyldaǵy dástúr boıynsha «Máńgilik alaý» mańyna gúl shoqtaryn qoıyp, soǵys qurbandarynyń rýhyna taǵzym etti. Ardagerlerdiń qurmetine konsert uıymdastyrylyp, onda patrıottyq ánder shyrqaldy.
Keńes-aýǵan soǵysyna 22 myńnan astam qazaqstandyq qatyssa, onyń eki myńnan astamy qazir Almatyda turyp jatyr. Olar qaladaǵy qoǵamdyq jumystar men is-sharalarǵa aýyq-aýyq qatysyp turady. Joba aıasynda aýǵan soǵysy ardagerleri onnan astam oqý ornyn aralap, stýdentterge ózderiniń aqyl-keńesterin, ósıetterin aıtty. Ol ardagerlerdiń arasynda aýǵan soǵysy men ózge de áskerı qaqtyǵystardyń ardagerleri men múgedekterin úlestirý keńesiniń, aýǵan soǵysy ardagerleri uıymynyń músheleri de boldy. Sonymen qatar ústel tennısinen, qazaq kúresinen, fýtboldan týrnırler ótip, jeńimpazdarǵa baǵaly syılyqtar men alǵyshattar aýǵan soǵysy ardagerleriniń qolymen tabys etildi.
Jyl ótken saıyn uly ekinshi dúnıejúzilik soǵys ardagerleri barlyq elde azaıyp keledi. Al Almatyda nebári júz shaqty ǵana ardager ómir súrip jatyr. «Nemenege jetistiń, bala batyr, qarııalar azaıyp bara jatyr», dep Muqaǵalı aqyn jyrlaǵandaı, endi biraz jyldan keıin olardyń bári qatarymyzda júrmeıtini aqıqat. Olarǵa kózi tirisinde kómek kórsetkenge ne jetsin?! Osyny túsingen bir top erikti jas elýden astam ardagerdiń úıin aralap, olarǵa azyq-túlik qorjyndaryn úlestirdi. Keıbiriniń úılerine jóndeý jumystaryn júrgizdi.
Elimizde ardagerlerge arnalǵan jobalar jetkilikti. Biraq bul olardyń keıingi urpaq úshin jasaǵan erlikterimen salystyrǵanda mysqaldaı ǵana nárse. Demek bizdiń olar úshin ister isimiz rııasyz, esepsiz bolǵany abzal.
ALMATY