Jaqynda Qazaqstan – Qytaı yntymaqtastyǵy boıynsha «Dostyq dıalogi» atty telekópir ótken bolatyn. Bul is-sharanyń ótýine eki el arasynda ekonomıkalyq baılanystardy odan ári nyǵaıtý men shekaralyq óńirlerdiń iskerlik qarym-qatynasyn jańa deńgeıge kóterý máseleleri arqaý boldy.
Beınebaılanys arqyly ótken yntamaqtastyq jıynynda Almaty oblysynyń ınvestısııalyq tartymdylyǵy men eki el kásipkerleriniń birlesken jobalary týraly da sóz boldy. Búginde óńirge ınvestısııa tartý baǵyty boıynsha naqty sharalar qabyldanǵan, onyń nátıjesi de joq emes. Mysalǵa, qazir Almaty oblysy álem boıynsha 97 elmen saýda yntymaqtastyǵyn júrgizýde. Bıylǵy 7 aıda oblystaǵy eksport aınalymy 179,9 mln AQSh dollaryn qurady. Budan basqa sheteldik ınvestorlardyń qatysýymen ashylǵan, jalpy quny 1,3 mlrd AQSh dollary bolatyn 19 joba júzege asyrylýda. Bul 6 500 jumys ornyn qurýǵa múmkindik beredi.
Osy sanatta kórshiles Qytaı elimen de saýda-sattyq, ónerkásiptik baılanys tereńdep otyr. Atap aıtqanda, ınvestısııalyq portfeli 94,5 mlrd teńge bolatyn jáne 350 adamǵa turaqty jumys ornyn usynatyn «Jetisý volframy» jobasy boıynsha kelisim iske qosylý satysynda eken. Joba boıynsha qytaı eliniń ınvestorlary Almaty oblysynyń aýmaǵyndaǵy «Buǵyty» volfram ken ornyn ıgerýge kirisken. Al taǵy bir aıtýly joba – «Jetiózenniń qýaty» jobasy jalpy ınvestısııa somasy 37,4 mlrd teńgeni quraıtyn, qýaty 60 MVt bolatyn «Shelek» jel elektr stansasynyń qurylysyn júzege asyrady. Joba iske qosylǵanda 30 adamǵa turaqty jumys orny ashylmaq.
– Almaty oblysy men Qytaı Halyq Respýblıkasy arasyndaǵy ekonomıkalyq qatynastardyń qazirgi jaǵdaıy jańa birlesken jobalardy iske asyrý boıynsha úlken múmkindikter ashady. Búginde logıstıka, týrızm, aýyl sharýashylyǵy, jańartylatyn energııa kózderi, óńdeý ónerkásibi, qurylys materıaldaryn óndirý jáne farmasevtıka syndy ekonomıkanyń salalary óńirdi damytýdyń basym baǵyttary bolyp otyr. Elimizdiń ońtústik-shyǵysynda ornalasqan bizdiń oblys pen kórshi elmen ortaq shekarasy 300 shaqyrymnan asady. Jáne Almaty oblysy – «Uly Jibek joly» boıynda jatqan tórt oblystyń biri, sondaı-aq óńir «Batys Eýropa – Batys Qytaı» halyqaralyq mańyzy bar avtomobıl dáliziniń ajyramas bóligi sanalady. Iаǵnı ekijaqty seriktestiktiń serpin alatyn sáti týdy, – deıdi Almaty oblysynyń ákimi Marat Sultanǵazıev.
Iаǵnı Almaty oblysynyń transkontınentaldy dáliz boıynda ornalasýy aımaq úshin ǵana emes, tutas el ekonomıkasyna tabys ákeletin jobalardy júzege asyrýǵa múmkindik beredi. Al kórshi memleket úshin Shyǵys qaqpadaǵy aımaqpen áriptestik 183 mln shamasyndaǵy adamı áleýeti bar Eýrazııalyq ekonomıkalyq odaq naryǵyna shyǵýdyń tıimdi joly bolyp otyr.
Aıtpaqshy, dál osy transkontınentaldy dáliz boıynsha saýda jáne ekonomıkalyq áriptestikti damytý máseleleri Qazaqstan – Qytaı yntymaqtastyǵy boıynsha «Dostyq dıalogi» atty telekópirde keńinen talqylandy. Al jıyn qorytyndysynda Almaty oblysynyń ákimi Marat Sultanǵazıev pen Qytaıdyń ShUAR halyq úkimetiniń tóraǵasy Erkin Týnııaz Shyńjań óńirimen baýyrlastyq baılanys ornatý nıeti týraly hattamaǵa qol qoıdy.
Almaty oblysy