Elimizde aýyl sharýashylyǵy mashınasyn jasaýdy damytýdyń ulttyq ortalyǵy qurylady. Bul týraly Indýstrııa jáne ınfraqurylymdyq damý mınıstrliginde ótken jıynda málim boldy.
Mınıstrlikke qarasty Indýstrııalyq damý komıtetiniń tóraǵasy Ilııas Ospanovtyń aıtýynsha, byltyr qazaqstandyq zaýyttar 183 mlrd teńgege 13 myńnan astam aýyl sharýashylyǵy tehnıkasyn shyǵarǵan. Bul taraptaǵy óndiristiń jyldyq ósimi 130 paıyzdy qurap, 2,3 ese artqan.
Sonymen qatar bıyl aýyl sharýashylyǵy tehnıkasyn jeńildetilgen lızıngke berý baǵdarlamasyn iske asyrýǵa 40 mlrd teńge bólindi. Onyń 30 mlrd teńgesi «Jasyl damý» AQ qarajatynan jáne 10 mlrd teńgesi «QazAgroQarjy» AQ-nyń kapıtal naryǵynan tartyldy. Budan bólek, О́nerkásipti damytý qory traktorlar men kombaındardy lızıngtik qarjylandyrý úshin 7 mlrd teńge qarajat bólmek.
– Elimizde aýyl sharýashylyǵy mashınasyn jasaýdy damytý — basymdyqqa ıe memlekettik mindettiń biri. Osy rette otandyq aýyl sharýashylyǵy tehnıkalaryn jasaýdy qoldaý maqsatynda Aýyl sharýashylyǵy mashınasyn jasaýdy damytýdyń ulttyq ortalyǵy qurylatyn bolady. Qazirgi kúnde bul baǵytta tıisti jumystar júrgizilýde. Sebebi elimizde agrarlyq sektorda resýrstar jetkilikti jáne bul ónimderdi tutynýshylar sany basym, – dep atap ótti komıtet tóraǵasy.
Jıynda mamandar saladaǵy birqatar túıtkildi máseleni ortaǵa salyp, ońtaıly sheshý joldaryn qarastyrdy. Jıyn barysynda kóterilgen saýaldar men usynystar boıynsha arnaıy taldaý jumystary júrgiziletin bolady.
Buǵan deıin Aýyl sharýashylyǵy mınıstrligi jeńildetilgen lızıng baǵdarlamasyn iske asyrǵan bir aı ishinde «QazAgroQarjyǵa» 43,6 mlrd teńgege 1 089 birlik aýyl sharýashylyǵy tehnıkasyn satyp alýǵa ótinim túskenin habarlaǵan edi. Bul rette 16,6 mlrd teńgege 369 birlik tehnıka qarjylandyrylǵan.
Jeńildikpen kredıt berý sharttary kelesideı: lızıng merzimi – 10 jylǵa deıin, jyldyq syıaqy mólsherlemesi – 6 paıyz, lızıng boıynsha bastapqy jarna – 0 paıyz, negizgi qaryzdy qaıtarý boıynsha jeńildikti kezeń – 1 jyl. Bir lızıng alýshyǵa qarjylandyrý somasy 205 mln teńgeden jáne úsh aýyl sharýashylyǵy tehnıkasynan aspaıdy. Qarjylandyrý eki jyldyq kezeń ishinde bir-aq ret beriledi.
«Jeńildetilgen nesıe baǵdarlamasy 20 jylǵa eseptelgen jáne revolverlik sıpatqa ıe. Ony iske asyrý úshin 40 mlrd teńge bólingen. Bul somaǵa Qazaqstanda jasalǵan 1 myńǵa jýyq aýyl sharýashylyǵy tehnıkasyn satyp alý josparlanyp otyr», dep habarlady Aýyl sharýashylyǵy mınıstrligi.