Manash Qozybaev atyndaǵy Soltústik Qazaqstan ýnıversıteti AQSh-tyń Arızona ýnıversıtetiniń basqarýyna beriledi. Bul joba Memleket basshysy Q.Toqaevtyń elimizde dúnıe júziniń aıtýly ýnıversıtetteriniń fılıaldaryn ashý týraly bergen tapsyrmasynyń aıasynda iske asyrylmaq.
Osydan bir jyl buryn AQSh-tyń Arızona ýnıversıteti, M.Qozybaev atyndaǵy SQÝ men Bilim jáne ǵylym mınıstrligi arasynda úshjaqty memorandýmǵa qol qoıyldy. Birlesken baǵdarlamalar boıynsha oqytý úsh tilde – aǵylshyn, qazaq jáne orys tilderinde júrgizilip, IT, ınjenerııa, agrotehnologııa men bıotehnologııa salalarynda mamandar daıarlaıdy jáne stýdentterdiń oqýyna granttar beriledi. Oqý prosesin tolyq aıaqtaǵan stýdentter M.Qozybaev jáne Arızona ýnıversıtetteriniń dıplomyn alady.
Álemniń joǵary standarttaryna sáıkes bilim alatyn stýdentterge arnalǵan jańa oqý kampýsy salyndy. Ýnıversıtet oblys ákimdiginiń qoldaýymen qajetti qural-jabdyqtarmen qamtamasyz etildi. Elimizdiń barlyq óńirinen qos dıplom alýǵa qol sozǵan 170 stýdent irikteldi. Búginde stýdentterdiń jataqhanasy da daıyn.
Jýyrda jańa jobanyń tusaýkeser rásimine Soltústik Qazaqstan oblysynyń ákimi Qumar Aqsaqalov, Ǵylym jáne joǵary bilim mınıstri Saıasat Nurbek, Arızona ýnıversıtetiniń vıse-prezıdenti Lızl Folks jáne AQSh-tyń Qazaqstandaǵy ýaqytsha senimdi ókili Devıd Alsı qatysty. Saltanatty jıyndy M.Qozybaev ýnıversıtetiniń rektory Erlan Sholanov ashyp, stýdentter men ata-analardy, zııaly qaýym ókilderin jańa jobanyń bastalýymen quttyqtady.
«Biz ýádemizde turdyq. Bıylǵy tynymsyz eńbegimizdiń arqasynda qos dıplom baǵdarlamasyna qatysatyn stýdentterdi qabyldap, olardyń oqýyna múmkindik týdyratyn barlyq jaǵdaıdy jasadyq. Osy iste bizdi qoldap, barynsha kómektesken oblys ákimdigine, Ǵylym jáne bilim mınıstrligine aıtar alǵysymyz sheksiz. Bizdiń stýdentterimiz tórtinshi kýrstan bastap Arızona ýnıversıtetinde oqıtyn bolady. Bul – álemdegi eń tańdaýly oqý oryndarynyń biri. Onyń 1 700 oqytýshy-pedagogteriniń arasynda 5 Nobel syılyǵynyń laýreaty, 7 Pýlıtser syılyǵynyń ıegeri bar. Osynyń ózinen-aq bilimniń joǵary deńgeıde bolatynyn kórýge bolady», dedi ol.
Oblys ákimi Q.Aqsaqalov bıyl oqýǵa túsken jastardy jáne olardyń ata-analaryn jas talapkerlerdiń joǵary belesimen quttyqtady.
«Bul – bizdiń ýnıversıtetimizdiń tarıhynda óte mańyzdy kezeń. Joba óńirdiń damýyna oń áserin tıgizetinine senimdimin. Elimizdiń túkpir-túkpirinen kelgen 170 stýdentti qabyldadyq. Aldaǵy jospar – ýnıversıtetimizde bilim alýshylar sanyn 10 myńǵa jetkizý. Bolashaqta Petropavldy stýdent jastardyń qalasyna aınaldyramyz», dedi oblys ákimi.
Saltanatty sharaǵa qatysqan Ǵylym jáne joǵary bilim mınıstri Saıasat Nurbek óziniń quttyqtaý sózin qazaq, orys jáne aǵylshyn tilderinde jetkizdi. «Memleket basshysynyń tapsyrmasy boıynsha biz álemge tanymal sheteldik ýnıversıtetterdiń bes fılıalyn ashamyz. Ázirge onyń úsheýi ashyldy. Buǵan deıin Almaty, Atyraý qalalarynda ashylsa, búgin úshinshi fılıal Petropavl qalasynda ashylyp otyr. Alǵash ret Arızona ýnıversıtetiniń úlken fılıalyn ashyp otyrmyz. Arızona ýnıversıteti sońǵy 5 jylda AQSh-tyń ınnovasııalyq eń joǵary oqý oryndarynyń reıtıngisine kirgen», dedi mınıstr.
Arızona ýnıversıtetiniń vıse-prezıdenti Lızl Folks stýdentterge eki birdeı joǵary oqý ornynyń oqytýshylary men professorlary dáris beretinin aıtty. «Qos dıplom baǵdarlamasy boıynsha oqýǵa túsken stýdentter 4-kýrsta Arızona ýnıversıtetiniń kampýsynda bilim alady. Dál osy baǵdarlama básekege qabiletti stýdentterdi daıarlaýǵa múmkindik beredi», dedi ol.
Ýnıversıtettiń jańa kampýsynyń zamanaýı oqý aýdıtorııalary, demalys bólmeleri jaryq ári keń. Is-sharaǵa qatysýshylarǵa ýnıversıtettiń jańa oqý-zerthanalyq korpýsynyń ǵylymı ortalyqtary boıynsha ekskýrsııa ótti.
PETROPAVL