Tórt adamnyń ómirin qutqaryp qalǵan sharbaqtylyq azamat Erkebulan Júzbaevty Pavlodar oblysynyń ákimi arnaıy baryp quttyqtady. Ábilqaıyr Sqaqov erjúrek azamatqa «Oblys aldynda sińirgen eńbegi úshin» belgisin tapsyryp, onyń erlik isi jas urpaqqa úlgi ekenin atap ótti.
Otbasy kúnine oraı Pavlodar oblysynda 554 otbasyna kómek kórsetildi. Oblys ákimi bastaǵan qaıyrymdylyq aksııasyn óńirdegi memlekettik qyzmetshiler, kásipkerler, demeýshiler men máslıhattar depýtattary qoldady. Azyq-túlik jıyntyqtarynan basqa az qamtylǵan otbasylardyń qajettiligi úshin 35,5 tonna kómir, 24 tonna shóp, 55 tekshe metr otyn bólindi jáne qarjylaı kómek kórsetildi.
Jýyqta Pavlodar-Sharbaqty tas jolynda órtke oranǵan avtokólikten tórt adamdy alyp shyǵyp, ómirlerin qutqaryp qalǵan Erkebulan Júzbaevtyń úıine barǵan aımaq basshysy onyń batyrlyq áreketine qandaı maqtaý aıtsa da jarasatynyn jetkizdi. Erlik jasaǵan azamatty «Oblys aldynda sińirgen eńbegi úshin» belgisimen marapattady. Otbasy kúnimen quttyqtap, otaǵasyna qarjylaı sertıfıkat tapsyrdy.
– Sizdiń jasaǵan erligińiz jurtqa úlgi bolýy kerek. Oblysymyzda aınalasyndaǵy adamdardyń taǵdyryna beıjaı qaramaıtyn siz sııaqty azamattardyń bar bolǵanyn maqtan etemin. О́ńir turǵyndary atynan erligińiz úshin alǵys bildiremin, – dedi Ábilqaıyr Sqaqov.
Esterińizde bolsa, qyrkúıek aıynyń basynda Krasnoarmeıka stansasynda temir jol montıory bolyp jumys isteıtin Erkebulan Júzbaev órtke oranǵan kólikten tórt adamdy qutqaryp qalǵan bolatyn. Apat Pavlodar – Sharbaqty avtojolynyń Maraldy stansasy mańynda bolǵan. Audi 100 kóligi KamAZ-dyń tirkegishine soǵylyp, keıinnen órtene bastaǵan.
42 jastaǵy Erkebulan Júzbaev zaıybymen birge eki qyz tárbıelep otyr. Qazir ol otbasymen turyp jatqan baspanasyn jóndeýde. Syılyq qarajatty qurylys materıaldaryn satyp alýǵa jumsaımyn, deıdi otaǵasy.
Pavlodar oblysy,
Sharbaqty aýdany