Keshe Májilis Tóraǵasy Erlan Qoshanovtyń tóraǵalyǵymen Palatanyń jalpy otyrysy ótti. Onda birqatar ratıfıkasııalyq zań jobasy maquldandy.
Atap aıtqanda, Eýrazııalyq ekonomıkalyq odaq (EAEO) pen Iran Islam Respýblıkasy arasyndaǵy erkin saýda aımaǵyn qurýǵa arnalǵan ýaqytsha kelisim, EAEO-nyń tehnıkalyq reglamentteri talaptarynyń saqtalýyna memlekettik baqylaýdy (qadaǵalaýdy) EAEO-ǵa múshe memleketterdiń kórsetilgen saladaǵy zańnamasyn úılestirý maqsatymen júzege asyrý qaǵıdattary jáne tásilderi týraly kelisim, sondaı-aq «Jahandyq jasyl ósý ınstıtýtyn qurý týraly kelisimdi ratıfıkasııalaý týraly» zań jobalary bar.
«2018 jylǵy 17 mamyrdaǵy bir taraptan EAEO men oǵan múshe memleketter jáne ekinshi taraptan Iran Islam Respýblıkasy arasyndaǵy erkin saýda aımaǵyn qurýǵa arnalǵan ýaqytsha kelisimge hattamany ratıfıkasııalaý týraly» zań jobasy boıynsha Saýda jáne ıntegrasııa birinshi vıse-mınıstri Erlan Battaqov baıandama jasady. Onyń aıtýynsha, tolyq aýqymdaǵy kelisim ázirlenip jatyr.
«Iran – biz úshin strategııalyq baǵyt. Bul – 80 mıllıonnan astam halqy bar áleýeti zor naryq. Kelisim uzartylǵan jaǵdaıda elderimiz arasyndaǵy taýar aınalymy 16-16,6%-ǵa nemese 377,4-440,1 mln AQSh dollaryna artady», dedi vıse-mınıstr.
Osy zań jobasy boıynsha Májilis depýtaty Jambyl Ahmetbekov sóz sóıledi. Ol bul jobanyń ýaqytsha kelisimdi 2025 jyldyń qazan aıyna deıin uzartýǵa baǵyttalǵanyn túsindirdi.
Májilistiń Ekonomıkalyq reforma jáne óńirlik damý komıtetiniń tóraǵasy Albert Raý kelisimniń Qazaqstanǵa eksporttyq qyzyǵýshylyq týdyratyn birqatar taýarǵa baj salyǵyn tómendetýge múmkindik bergenin atap ótti. Alaıda qazaqstandyq eksportshylar tarıftik preferensııalar alatyn jekelegen taýarlar tiziminde astyq, un men qurysh sııaqty elimiz úshin mańyzy zor taýarlar joq.
«EAEO elderi men Irandaǵy ımporttyq kedendik baj salyǵynyń teńsiz tómendeýi de nazar aýdartady. Iran tarapy sıyr eti, burshaq daqyldary, ósimdik maılary, makaron, kondıterlik ónimder sekildi 360 taýarǵa, al EAEO elderi 502 taýarǵa ımporttyq baj salyǵyn tómendetti. Olar: piste, qurma, meıiz, kondıterlik ónimder jáne taǵy basqalar», dedi A.Raý.
Sondaı-aq depýtat erkin saýda aımaǵy týraly tolyqqandy kelisim boıynsha kelissózder belsene júrip jatsa da, otandyq bıznestiń múddesin qorǵaý qajettigine basa nazar aýdardy.
Otyrys barysynda vıse-mınıstr E.Battaqov «Eýrazııalyq ekonomıkalyq odaqtyń tehnıkalyq reglamentteri talaptarynyń saqtalýyna memlekettik baqylaýdy (qadaǵalaýdy) Eýrazııalyq ekonomıkalyq odaqqa múshe memleketterdiń kórsetilgen saladaǵy zańnamasyn úılestirý maqsatymen júzege asyrý qaǵıdattary jáne tásilderi týraly kelisimdi ratıfıkasııalaý týraly» zań jobasy boıynsha baıandama jasady.
Bul Kelisim EAEO-ǵa múshe memleketterdiń aýmaǵynda tehnıkalyq reglamentterdiń talaptaryna sáıkes kelmeıtin ónimdi anyqtaý, sondaı-aq aınalymǵa shyǵarmaý maqsatymen memlekettik baqylaý (qadaǵalaý) organdarynyń ózara is-qımylyn aıqyndaıdy.
Sonymen qatar jalpy otyrysta Ekologııa, geologııa jáne tabıǵı resýrstar vıse-mınıstri Talǵat Momyshev «Jahandyq jasyl ósý ınstıtýtyn qurý týraly kelisimdi ratıfıkasııalaý týraly» zań jobasy boıynsha baıandama jasady. Vıse-mınıstrdiń aıtýynsha, Jahandyq jasyl ósý ınstıtýtyn qurý týraly kelisimge 2012 jyly 20 maýsymda Rıo-de-Janeıroda qol qoıylǵan. Instıtýttyń ózi 2010 jyly quryldy jáne halyqaralyq zertteý ortalyǵy bolyp tabylady. Onyń negizgi qyzmeti – ekonomıkalyq ósýdiń jańa modeli sanalatyn «Jasyl ósýdi» qoldaý.
«Instıtýt Parıj kelisimi aıasynda qabyldanǵan mindettemelerge qol jetkizý úshin jasyl ósý strategııalary men ulttyq josparlar ázirleýde úkimetterge qoldaý kórsetedi. Instıtýt qoldaýdyń birneshe baǵytyn qamtıdy: ekologııalyq áserdi baǵalaý, qarajat tartý jáne jasyl jobalardy júzege asyrý, bilim almasý», dedi T.Momyshev.
Sondaı-aq bul kelisimge qosylý arqyly Qazaqstan ózine eshqandaı mindetteme júktemeı, tehnıkalyq kómek tartý múmkindigi men ınstıtýttyń saraptamalyq áleýeti jáne jınaqtalǵan bilim bazasyna qol jetkizetinin atap ótti.
Otyrys sońynda Májilis depýtattary memlekettik organdar basshylaryna depýtattyq saýaldar joldady.