Elimizde saqtandyrýdyń jańa baǵdarlamalary bastalyp, onyń aıasynda alma baqtaryn saqtandyrý qolǵa alynbaq. Mamandardyń aıtýynsha, agrosaqtandyrýdyń jańa baǵdarlamalary baý-baqsha sharýashylyǵyndaǵy qaýipti azaıtady. 2021-2025 jyldarǵa arnalǵan Qazaqstan Respýblıkasynyń agroónerkásiptik keshenin damytý jónindegi Ulttyq jobasy sheńberindegi negizgi mindetterdiń biri – otandyq óndiristiń negizgi azyq-túlik taýarlarymen, onyń ishinde alma óndirýmen qamtamasyz etý.
Aýyl sharýashylyǵy mınıstrliginiń habarlaýynsha, saqtandyrý ónimderi óndiristi júrgizý ereksheligine baılanysty ıntensıvti jáne jartylaı ıntensıvti alma baqtaryna arnalǵan. Intensıvti jáne jartylaı ıntensıvti baqtarda ósiriletin alma aǵashtaryn otyrǵyzǵannan keıin úshinshi jyldan bastap (eki qystaǵan soń), sonymen qatar ishki jáne syrtqy naryqtarda jańa terilgen kúıinde óńdeýge jiberý úshin alma jemisin saqtandyrýǵa bolady.
«Alma baqtaryn (aǵashtaryn) saqtandyrý burshaq, órt, qatty jel, qysta úsik shalý, kóktemgi jáne kúzgi úsik shalý, naızaǵaıdyń túsýi, shamadan tys qar jaýý nemese butaq qabyǵynyń muzdan zaqymdanýy, jabaıy janýarlardyń zııan keltirýi nemese joıýy, belgisiz tulǵalardyń zańdy nemese zańsyz áreketi syndy táýekeldiń túr-túrin qamtıdy. Bul ónim boıynsha saqtandyrý tarıfi – 0,8 paıyz, saqtandyrý kezeńi – osy jyldyń 1 qarashasynan kelesi kúntizbelik jyldyń 31 qazanyna deıin. Alma jemisin saqtandyrý kóktemgi úsikten, burshaqtan, qatty jelden, órtten, naızaǵaıdyń túsýiniń, zııankester men aýrýlardan eginge keletin shyǵynnan, belgisiz tulǵalardyń zańdy nemese zańsyz áreketi sııaqty qaýipten saqtaıdy. Bul ónim boıynsha saqtandyrý tarıfi – 11,2 paıyz, saqtandyrý kezeńi – 15 sáýirden 15 qazanǵa deıin, eger ónim 15 qazanǵa deıin jınalsa, ýaqytynan keshiktirmeý qajet», delingen vedomstvo habarlamasynda.
«Agrarlyq nesıe korporasııasy» AQ basqarýshy dırektory Erlan Moldashevtyń aıtýynsha, bul saqtandyrý, ásirese Almaty, Jambyl, Jetisý jáne Túrkistan oblystarynyń aýyl sharýashylyǵy taýar óndirýshileri úshin qoljetimdi. Baqtardy osy jyldyń 31 qazanyna deıin saqtandyryp úlgerý qajet. Saqtandyrý baǵdarlamalary boıynsha saqtandyrý syıaqysynyń 80 paıyzy sýbsıdııalaý túrinde memlekettik qoldaý esebinen tólenedi, ıaǵnı fermer saqtandyrý polısi qunynyń 20 paıyzyn ǵana tóleıdi.
Baǵbandyq boıynsha saqtandyrý ónimderin Qarjy naryǵyn retteý jáne damytý jónindegi agenttiginiń lısenzııasy bar «Jusan Garant «SK» AQ saqtandyrý kompanııasy engizgen. Buǵan álemdik saqtandyrý naryǵynda «A» reıtıngisi bar Swiss Re halyqaralyq qaıta saqtandyrý kompanııasy tartyldy. Otandyq kompanııa ózine alatyn táýekelderdi qaıta saqtandyrady. Bul saqtandyrý jaǵdaıy týyndaǵan kezde kepildendirilgen tólemdi qamtamasyz etedi.
Basqa saqtandyrý kompanııalary ósimdik jáne mal sharýashylyǵyndaǵy buryn ázirlengen ónimderge uqsas saqtandyrýdyń osy túrine qosyla alady. Bul rette saqtandyrý kompanııalary alma baqtaryna arnalǵan basqa da ónimderdi ázirleýge quqyly.
Aıtpaqshy, saqtandyrý rásimin mobıldi qosymsha arqyly júrgizýge múmkindik bar. Shart jasasýdan tólemge deıingi barlyq rásim aqparattyq sıfrlyq platformada júrgiziledi.