Dúnıede et jaqynyńnyń, ıa bir jaqsy kóretin qımas janyńnyń teris aǵymnyń shylaýynda ketip bara jatqanyn kóre tura sharasyz bolýdan asqan qıyndyq joq shyǵar, sirá?! Qaırany joq, alysyp-aıtysarǵa dinı saýatynyń jetimsizdigi dármenin kemitip, pushaıman kúıge túskender sanynyń, ókinishke qaraı, jyl saıyn kemıtin túri joq. Qoǵamǵa túsken zil-batpan salmaq qanshama otbasyǵa oıranyn salýda. Ne isteý kerek, osy bir qasiretti, qalyńdaı túskisi kelip turǵan qalyń tumandy qalaı seıiltýge bolady?
Poshta jáshiginen aı saıyn kommýnaldyq qyzmet túrlerine keletin tólem habarlamasyn alǵanmyn. Konvertti ashqanymda ishinde habarlamaǵa qosymsha qaǵaz júr eken. Jazýyna úńildim. Eger sizdiń jaqyn adamyńyzǵa áldeqandaı bir túsiniksiz dinı ýaǵyzdar aıtýshy baryn bilseńiz nemese páterińizdiń esigin qaǵyp, bolmasa podezińizge kirip, kólikte otyrǵanyńyzda dinı mazmundaǵy ádebıetter, únparaqtar taratý málim bolsa, eger sizdi dinı basqosýlar men jıyndarǵa kelýdi úgittese, jaqynyńyz jat aǵymnyń shylaýyna tússe, bizben habarlasyńyz dep «Qaýyrt jeli» atty Aqparattyq keńes berý ortalyǵynyń jumys isteıtinin, onyń 114 nómirine tegin telefon shalýǵa bolatyny týraly jazylǵan eken.
Tólem habarlamasyna Ortalyqtyń telefony jazylǵan paraqty qosyp jiberýdi qalaı jaqsy oılap tapqan, qajet adamdy qulaqtandyrýdyń ádemi ádisi eken dep ishteı súısindim. Telefon shalyp, ıgilikti is bastaýlaryna rızashylyǵymdy bildirip, habarlasyp jatqandardyń bar-joqtyǵyn suradym. Ortalyqtyń basshysy Iýlııa Denısenko meni qajetti aqparatpen qamtamasyz etetinin aıtty.
Sonymen, ortalyq qalaı jumys isteıdi? Keńes berý 24 saǵat boıyna úzbesten júrgizilip, maman zańgerler men teologtar, dintanýshylar men psıhologtar telefonmen de, júzbe-júz de, kompıýter arqyly www.1401.kz. jelisinde onlaın túrinde de kómek qolyn sozady eken. Tek Astana ǵana emes, Qazaqstannyń qaı eldi mekeninen de qalalyq telefonǵa habarlasý tegin.
Kún saıyn ondaǵan adam muńyn shaǵyp, qajet tusta barlyq mamandar qysylǵan janǵa birige járdem kórsetetin Ortalyqqa tek osy jyldyń birinshi toqsanynda 500-deı adam habarlasqan kórinedi. 1200-deı azamat otbasylarynda dinı aǵymnyń yqpalynan problemalar týyndaǵanymen ortaqtasqan. Adasqan adamdy qaıyra úıirine qosý – óte bir jaýapty da kúrdeli ári názik jumys. Keıde onyń tolyqqandy óz ortasyna oralýyna kóp ýaqyt jumsalady degen Ortalyq mamandary 69 ótinishtiń quqyq qorǵaý salasyna jiberilgenin, al 4-ýi boıynsha qylmystyq is qozǵalǵanyn jetkizdi.
Dinı teris aǵym salǵan lań otbasylardy ishten iritip, keıde adamdardyń ózine ózi qol salýlaryna da ıtermeleıtinin aıtqan mamandar búgingi tańda elimizdiń kóleminde 28 osyndaı Ortalyqtyń jumys jasap jatqanynan habardar etti.
Esińizge salamyz, telefon nómiri – 114.
Anar TО́LEÝHANQYZY,
«Egemen Qazaqstan».