Ál-Azhar sheıhy bas meshitte juma ýaǵyzyn aıtty

Ál-Azhar sheıhy meshit jamaǵatyna birlik pen beıbitshiliktiń qadiri, Islam qundylyqtary, musylman úmbetiniń rýhanı tutastyǵy jaıly nasıhatyn jetkizdi.

«Islam – terrorızm dini emes. Ekeýi ot pen sý sekildi eki bólek uǵym. Asyl dinimiz álem halqyn beıbit ómir súrýge jáne aýyzbirshilikke úndeıdi. Dinniń dinnen, ulttyń ulttan, adamnyń adamnan artyqshylyǵy joq. Barlyǵy da – Allanyń quldary. Sondyqtan aınalańyzdaǵy adamdardy jaqsylyqqa, yntymaqqa, birlikke shaqyryńyzdar», dedi Joǵary mártebeli ımam Ahmet Taıyp.

Sondaı-aq ál-Azhar sheıhy qazaq dalasynan shyqqan oıshyl Ábý Nasyr ál-Farabı bastaǵan din ǵulamalary Islamdy álemge dáriptegenin, sol bilimniń sharapaty arab halqyna da tıgenin aıryqsha atap ótip, sol ilim ıeleriniń asyl eńbegi úshin qazaq halqyna alǵysyn bildirdi.

Ýaǵyzdan keıin QMDB Tóraǵasy, Bas múftı Naýryzbaı qajy Taǵanuly qazaqy qonaqjaılyqpen sheıh Ahmet Taıyptyń ıyǵyna shapan jaýyp, Islam dininiń dáriptelýine, dinı bilim men ǵylymnyń damýyna erekshe úles qosqan tulǵalarǵa beriletin Dinı basqarmanyń «Sharapat» medalimen marapattady.  

Aıta keteıik, ál-Azhar sheıhynyń juma ýaǵyzyna 20 myńnan astam adam qatysty.

Sonymen qatar Nursultan Nazarbaev «Ál-Azhar» ýnıversıtetiniń Bas ımamy Sheıh Ahmed at-Taıebpen kezdesti. Kezdesý astanadaǵy Bas meshitte oqylǵan juma namazynan soń boldy.

Áńgimelesý kezinde taraptar dúnıe júzinde  konfessııaaralyq dıalogtyń ózekti máseleleri jóninde pikir almasyp, Qazaqstanda ótken Álemdik jáne dástúrli dinder kóshbasshylary seziniń atalǵan úderistegi mańyzdy rólin aıryqsha atap ótti.

Qazaqstannyń Tuńǵysh Prezıdenti Qazaqstan men Mysyr arasynda qarym-qatynas ornatý barysy, sonyń ishinde joǵary bilim berý salasyndaǵy baılanystar týraly óz estelikterin ortaǵa saldy.

Nursultan Nazarbaev sondaı-aq Ahmed at-Taıebtiń Sezde sóılegen sóziniń negizgi tezısterine qoldaý bildirip, dinder kóshbasshylary arasyndaǵy ashyq dıalogty qamtamasyz etýdiń mańyzdy ekenine toqtalyp ótti.