Qazaq halqynyń daraboz perzenti, kórnekti memleket jáne qoǵam qaıratkeri Asanbaı Asqarovtyń 100 jyldyq mereıtoıy Merki jerinde sán-saltanatymen atalyp ótti. Eldik deńgeıde uıymdastyrylǵan is-sharaǵa Memleket basshysynyń keńesshisi, qalamger Málik Otarbaev arnaıy qatysyp, Prezıdenttiń quttyqtaýyn jetkizdi.
«Asanbaı Asqarov syndy elin súıgen, halyqtyń qurmetine bólengen perzentterimiz kóbeıe bersin. Toı – toıǵa ulassyn. Barshańyzdyń otbasyńyzǵa amandyq, shańyraqtaryńyzǵa jaqsylyq tileımin», delingen Prezıdenttiń quttyqtaý hatynda. «Alashtyń arda týǵan Asanbaıy» taqyrybynda uıymdastyrylǵan respýblıkalyq aqyndar aıtysymen bastalǵan mereıtoı ózge de is-sharalarmen jalǵasyn tapty. Elimizdiń ár qıyrynan kelgen mártebeli meımandar Alashtyń ardaqty ulynyń bıýstine gúl shoqtaryn qoıyp, rýhyna taǵzym kórsetti.
Kópshilik aldynda sóz alǵan qaıratker tulǵanyń qyzy Sholpan Asqarova jurttyń qurmetine degen rızashylyǵyn jetkizdi.
«О́z basym búgin óte qatty tolqyp turmyn. О́ıtkeni ýaqytynda eli úshin aıanbaı eńbek etken ákeme degen zor qurmet aıqyn sezilýde. Jerlesterdiń yqylasy men nıet-peıiline qarap-aq, ákemniń joqtaýshysy, qurmetteıtin halqy bar ekenine kózim jetti. 98 jastaǵy Fatıma anam Almatyda turady. Mereıtoılyq is-sharaǵa qatysa almasa da, rızashylyq sálemin joldady. Bul – as iship, aıaq bosatatyn jer emes, taǵylymnyń toıy. Sol úshin de sizderge alǵysymyz sheksiz», dedi ol óz oıyn túıindep.
Is-shara barysynda aýdandaǵy №1 mektepke Asanbaı Asqarovtyń esimi berildi. Bul – qaıratker tulǵanyń qaltqysyz eńbegin baǵalaýdyń jarqyn kórinisi. Merkige arnaıy kelgen Qazaqstan Prezıdenti arhıviniń ǵylymı qyzmetkeri Aıan Joldasov jınalǵan jurtshylyqtyń nazaryna birqatar tarıhı qujatty usynyp, tanystyrdy.
Bilim ordasynyń májilis zalynda «Týǵan jerdiń týyn bıiktetken tulǵa» atty ǵylymı-tájirıbelik konferensııaǵa qatysqan oblys ákiminiń orynbasary Qanatbek Mádibek is-sharaǵa arnaıy kelgen meımandar men ǵalymdarǵa alǵysyn jetkizdi. Konferensııany qalamger Naǵashybek Qapalbekuly júrgizip otyrdy.
«Qaıratkerdiń ómir súrgen dáýiri de asa kúrdeli boldy. Soǵan qaramastan, ol orys tilinde bilim alyp, 1939 jyly 17 jasynda mektep oqýshylaryna orys tilinen sabaq berdi. Ýaqyt óte kele oblystyq partııa komıtetiniń birinshi hatshysy, ıaǵnı oblys basshysy deńgeıine kóterildi. Merki aýdanynda birinshi hatshy kezinde Shý, Talas ózenderin paıdalana otyryp, óńir ekonomıkasyn damytýǵa kúsh saldy.
Kezinde Asqarov saldyrǵan «Qazaqstan» qonaqúıi, «Medeý» muzaıdyny, «Sarbazdar úıi» Memlekettik syılyqqa usynyldy. Al sodan beri Almatyda eshqandaı ǵımarattyń qurylysy memlekettik syılyqqa usynylǵan emes.
Osydan-aq, Asqarovtyń uıymdastyrý qabileti, abyroıy qandaı bolǵanyn bile berýge bolady. Ońtústik Qazaqstan oblysyn basqarǵanda da shyny, qorǵasyn zaýytynyń jumysyn jandandyryp, ındýstrııa salasynyń damýyna úles qosty. Shymkentte salynǵan saıabaqqa shetelden neshe túrli jemis aǵashtaryn ákelip otyrǵyzdy. Adal eńbegi úshin Sosıalıstik Eńbek Eri atanyp, 5 ret Lenın ordenin ıelendi. Asqarovtyń esimin nege bir aýdanǵa bermeske?
Asanbaı Asqarovtyń ómirine, ónegeli isterine arnap nege fılm túsirmeske?» dep túıindedi óz oıyn Memlekettik syılyqtyń laýreaty, akademık Orazaly Sábden. О́zge ǵalymdar da kókeıde júrgen oılaryn aıtyp, asqar taý alystaǵan saıyn bıikteı túsetinin eske saldy.
Bul kúni Asqar Toqpanov atyndaǵy oblystyq qazaq drama teatry jazýshy Marhabat Baıǵuttyń «Asqarovtyń aqqaıyńdary» dramasyn sahnalady. Syn saǵattarda rýhy synbaǵan tulǵanyń beınesi taǵy da teatr qoıylymy arqyly asqaqtaı tústi. Is-shara sońynda eki kúnge sozylǵan aqyndar aıtysynyń qorytyndysy shyǵarylyp, jeńimpazdar qomaqty qarjylaı syılyqpen marapattaldy.
Jambyl oblysy,
Merki aýdany