Munaıly óńirge ınvestısııa salýǵa sheteldikter qyzyǵýshylyǵy artyp keledi. Máselen, majarstandyq Globalia kompanııasynyń dırektory Gabor Shagı Atyraý oblysynda kúnnen energııa alý jobasyn usynyp otyr.
Oblys ákimi Serik Shápkenovtiń málimetine súıensek, bıylǵy alty aıda Atyraý oblysynyń Majarstanmen ishki saýda aınalymy 894 myń dollarǵa jetken. Onyń ishinde eksport kólemi 440 myń dollardy, ımporttyń úlesi 454 myń dollardy qurady.
Ákim men majarstandyq ınvestor osy kezge deıingi ekonomıkalyq, iskerlik baılanysty bekemdeı túsýdiń yqtımal baǵyttaryn talqylap, ortaq múddeni kózdeýdi maqsat etip otyr. Sonyń dálelindeı, majar ınvestory Atyraý oblysynda qýaty 100 MVt bolatyn kúnnen qýat alý parkin iske asyrý ıdeıasyn usyndy.
– Atyraý oblysynyń ekologııalyq ahýaly kóńil bólýdi qajet etedi. Osy oraıda kúnnen qýat alý jobasynyń mańyzy zor. Oǵan qajetti sý kózin «Sasyqsaı» býlaný alańynan alýdy usynǵym keledi. Qazir oblysqa qarasty keıbir aýdandar elektr jelisin kórshiles Reseı Federasııasynan alyp otyr. Ony óz balansymyzǵa alý úshin birneshe shaqyrym jeli tartyp, beket ornatý qajet. Osy joba aıasynda 20 mVt-tyq ındýstrııalyq saıabaq salǵan áldeqaıda tıimdi bolar edi. Sol sebepten, bizdiń tarapymyzdan bul jobaǵa qajetti qoldaý kórsetiledi, – dep málim etti S.Shápkenov.
Sheteldik ınvestordyń aıtýynsha, ekologııalyq taza energııamen qamtamasyz etetin «Kún sáýlesiniń kómegimen sýtegi generatory arqyly jasyl energııa alý» jobasynyń tıimdiligi kóp. О́ıtkeni qalany úzdiksiz elektr energııamen jabdyqtaýdyń balamaly nusqasy – sýtegi generatory.
– Oǵan qajetti energııa kúnnen qýat alý saıabaǵy nemese jel elektr stansalary arqyly óndiriledi. Elektrolız kezinde alynǵan sýtegi gazyn shaǵyn elektr qurylǵylaryna, avtokólikterge, onyń ishinde avtobýstarǵa, tipti úlken elektr qondyrǵylaryna qýat berý úshin paıdalanýǵa bolady. Sýtegi generatoryna janar-jaǵarmaı generatorlarymen birdeı otyn jumsalsa da uzaq jumys isteıdi, – deıdi Gabor Shagı.
Atyraý oblysy