Soltústik Qazaqstan oblysynda 10 aýyldyq mektep apatty jaǵdaıda tur, dep habarlaıdy Egemen.kz.
Bilim berý departamentiniń habarlaýynsha, Aıyrtaý aýdanynyń Novosvetlov jáne Komarovskaıa orta mektepteri, M.Jumabaev aýdandyq mektebi, Kishkenekól qazaq mektep-gımnazııasy, Ýálıhanov aýdanynyń Qyzyltús orta mektebi, Kıev, Qarashy, Bostandyq, Novosvetlovskaıa mektepteri shuǵyl jóndeý jumystaryn talap etedi.
«Respýblıkalyq bilim berý derekter bazasyna sáıkes, 472 mekteptiń 85-i beıimdelgen úı-jaılarda ornalasqan - 18%, 387 mektep kirpishten salynǵan, Aqqaıyń aýdanyndaǵy Túmen mektebiniń ǵımaraty qamystan salynǵan, úsh bastaýysh mektep aǵash ǵımarattarda ornalasqan. Petropavl qalasyndaǵy eki mektep 1936 jyly salynǵan ǵımarattarda ornalasqan. Jalpy oblys boıynsha 1930-1979 jyldar aralyǵynda 271 mektep, ıaǵnı 58 paıyzy salynǵan. Eki-úsh qabatty úılerdiń bir bóligin ǵana alyp jatqan mektepter bar. Osyǵan oraı, jergilikti atqarýshy organdardyń kezek kúttirmeıtin mindeti – oqý ǵımarattarynyń tehnıkalyq jaǵdaıyn qadaǵalaý jáne apatty jaǵdaılardyń aldyn alý», dedi vedomstvodan.
Taıynshy aýdanyndaǵy úsh mektep apatty jaǵdaıda tur. Taıynshy aýdan ortalyǵynda jáne Vıshnevka aýylynda eki jańa qurylys bastaldy. Dragomırovka aýylyndaǵy jańa mekteptiń qurylysy úshin jobalyq-smetalyq qujattama jasalýda.