Venada alǵash ret «One world. New generation» mádenı is-sharalar aptalyǵy aıasynda Qazaqstan balalarynyń sýret kórmesi ashyldy. Eýropa júregine qazaq eliniń atynan barǵan jas talanttar – balalar shyǵarmashylyǵyn damytýǵa arnalǵan «Janýarlar – meniń dostarym» jáne «Meniń jasyl planetam» baıqaýlarynyń jeńimpazdary.
«Janýarlar – meniń dostarym» jáne «Meniń jasyl planetam» konkýrstary 2020 jyly Bala quqyǵy jónindegi ýákil Arýjan Saınnyń ıdeıasy negizinde Prezıdent Qasym-Jomart Toqaevtyń qamqorlyǵymen ótken bolatyn. Bastamany Dúnıejúzilik qorshaǵan ortany qorǵaý kúnin atap ótý aıasynda BUU qorshaǵan ortany qorǵaý baǵdarlamasy, Bilim jáne ǵylym mınıstrligi, Mádenıet jáne sport mınıstrligi, «Balalar beıbitshilikti salady» jáne «Meıirimdilik» qorlary qoldady. Osy jobada qatarlastarynan oq boıy ozǵan 10 jetkinshek aıtýly kórmege Qazaqstannyń Aýstrııadaǵy elshiliginiń jáne Bas demeýshi EduStream kompanııasynyń qoldaýymen keldi.
«Jobanyń basty maqsaty – qoǵam sanasynyń janýarlarǵa degen qarym-qatynasyn ózgertý jáne qatygezdikke jol bermeý», deıdi uıymdastyrýshylar. Taqyrypqa tereń úńilgen 6 myńnan astam óren tek sýret salyp qoıǵan joq, sonymen qatar eresekterge arnap esse, beıneúndeý jazyp, qatygezdikti synǵa aldy, qoǵamdy meıirimdilik pen mahabbatqa shaqyrdy.
«Eresekter kip-kishkentaı qorǵansyzdardy qalaı qańǵytyp qoıady, bul meniń mıyma syımaıdy. Adamdyq qasıetimizdi joǵaltpaıyq, úı janýarlaryn jáne jer sharyndaǵy barsha haıýanattardy qorǵaıyq», dep jazdy óz essesinde saryózektik Aqjan Qaıyrbekqyzy. Al pavlodarlyq Artem Kýstov balań únin tabıǵatty qorǵaý taqyrybynda jazǵan óleńimen jetkizdi.
– Balalarymyzdyń jan aıqaıy elenetinine úmitimiz zor. Olardyń eresekterge, Parlamentke jáne Úkimetke jasaǵan usynystary jer sharyn, bizdiń súıikti Qazaqstanymyzdy, tabıǵatty, janýarlar álemin saqtap qalýǵa yqpalyn tıgizer. Balalardan buryn, eresekterdiń sanasy ózgeristi qajet etedi, nege deseńiz, bala jaǵdaıy men ǵalamsharymyzdyń qaýipsizdigi solarǵa baılanysty, – deıdi Qazaqstandaǵy Bala quqyǵy jónindegi ýákil Arýjan Saın.
Aptalyq aıasynda Qazaqstannyń Aýstrııadaǵy elshisi Qaırat Omarovtyń qatysýymen balalar sýreti kórmesiniń saltanatty ashylý rásimi ótti. Jas jeńimpazdardyń týyndysyn BUU Venadaǵy bólim jetekshisi Gada Valı, aýstrııalyq parlament depýtattary, birqatar memleket elshileri, EQYU basshylary, sondaı-aq Vena merııasy men jergilikti memlekettik bilim organdary baǵalady.
– Balaǵa bilim berý isinde mádenıet pen óner qatar júrgeni abzal. Adam boıyna qorshaǵan ortaǵa degen súıispenshilikti jastaıynan sińirý, prınsıptik turǵyda mańyzdy. Jalpy, adamzat qundylyǵy tabıǵatymyzdy qorǵaý damyǵan elderdiń mektepte bilim berý standartynda eskeriledi. Qazaqstannyń bilim berý salasynyń qatysýshysy ári novatory retinde biz mektepke oqýlyq daıyndaǵanda álemdik talapty negizge alamyz, – deıdi EduStream kompanııasynyń bas dırektory Natalıa Muhamedjanova.
Balǵyn sýretshilerge shabyt bergen baǵdarlama kórmemen qatar til mektebinde sheberlik sabaǵyn ótýge, sondaı-aq Aýstrııanyń aıshyqty oryndaryn aralaýǵa múmkindik syılady.
ALMATY