Inder aýdanynyń aýmaǵynda aýqymdy tuzdy kól bar. «Indertuzcompany» JShS tuzdy kólden joǵary sapaly as tuzyn óndirýdi qolǵa aldy.
Seriktestiktiń tehnıkalyq dırektory Dımat Týǵanbaıdyń aıtýynsha, 2017 jyldan beri tehnıkalyq maqsatta qoldanylatyn tuz óndirilip keledi. Qazir otandyq kásiporynda jergilikti 10 turǵyn jumyspen qamtylǵan. Endi jyl sońyna deıin taǵy da jergilikti 60 adamdy jumyspen qamtý kózdelip otyr.
– Bizdiń kásiporynda as tuzy standartty ádispen óńdeledi. Otandyq ónim joǵary sapaly, krıstaldylyǵy 99,5 paıyzdy quraıdy. As tuzy 1 kılolyq dorbaǵa salynady. Jańa ónimdi Qazaqstannyń barlyq óńirindegi tutynýshyǵa jiberý josparlanyp otyr. О́ıtkeni ıodtalǵan tabıǵı mıneraldyń adam densaýlyǵy úshin, naqtyraq aıtsaq, júrek, qan aınalymy úshin mańyzy zor. Biz aıyna 2 myń tonna as tuzyn óndirýdi josparlap otyrmyz. Qazir otandyq taýardyń qujattary ázirlenip jatyr. Saraptamadan keıin ishki naryqqa jónelte bastaımyz, – deıdi Dımat Týǵanbaı.
Onyń málimetine súıensek, kásiporynda saǵatyna 20 tonna tuz óńdeledi. Qazirdiń ózinde Reseı Federasııasynan tapsyrys túsipti.
Atyraý oblysy