Jaqynda Qyrǵyzstannyń Ystyqkólinde strendlıftıng sportynan toǵyzynshy álem chempıonaty ótti.
Aýyr atletıkaǵa uqsas osy sport Qazaqstanda da damı bastady. Elimizde qol kúresi men gir sportynyń negizin qalaýshy, 1992-2004 jyldary Halyqaralyq gir sporty federasııasynyń vıse-prezıdenti, 2004-2012 jyldar aralyǵynda Búkilálemdik armrestlıng federasııasynyń vıse-prezıdenti qyzmetin atqaryp, qol kúresinen dúnıe júziniń úsh dúrkin chempıony atanǵan, Almatyda, О́skemende qol kúresi men gir sportynan álem, Azııa birinshilikterin abyroımen ótkizip, osy sport túrleriniń Qazaqstanda, Azııada, álemde órkendeýine erekshe úles qosqan Muhamedolla Aǵzamov jasy jetpisten assa da alpys jastaǵy ardagerler arasynda 95 kılo salmaqta strendlıftıngten álem chempıony atandy. Aıta ketý kerek, M.Aǵzamov – sporttyń ártúrli, ózara uqsas emes eki túrinen álem chempıony atanǵan Qazaqstandaǵy jalǵyz atlet.
Qyrkúıektiń 5-i men 10-y aralyǵynda Ystyqkólde jalaýy jelbiregen álem chempıonatynda Qazaq elinen barǵan úsh sportshy da namysty qoldan bermeı, altynnan alqa taqty. Atap aıtqanda, Muhamedolla Aǵzamovtyń jeńisti jolyn Marat Mardenov pen Ivan Malkov 68 jáne 76 kılo salmaqtarda jalǵastyrdy. M.Aǵzamovtyń uly Júrsin Aǵzamov eresekter arasynda 115 kılo salmaqta qola medal ıelendi. Talantty ustazdyń uly osy joly taǵy bir qurmetke ıe boldy. Dúnıejúzilik strendlıftıng federasııasynyń prezıdenti Babýl Bıkas Patrabanıstyń usynysymen Júrsin Aǵzamov osy federasııanyń vıse-prezıdenti bolyp saılandy. Demek, bolashaǵy zor sport túri Qazaqstanda damı túspek.
– Strendlıftıng – bolashaǵy zor sport. Ol Úndistanda dúnıege keldi. Qazirdiń ózinde álemniń elýden astam memleketiniń adamdary strendlıftıngpen shuǵyldanady. Aýyr atletıkamen aǵaıyndas, biraq odan da kúrdeli sport túri bolashaqta Olımpıada baǵdarlamasyna enip jatsa, tańǵalmaý kerek. Iаǵnı sporttyń osy túrin Qazaq eli de jatsynbaýy kerek, – deıdi M.Aǵzamov.
Ońdasyn ELÝBAI,
jýrnalıst
О́SKEMEN