Jýyrda «Qazaqstan halqyna» qoǵamdyq qorynyń uıymdastyrýymen «Qazaqstan halqyna» Ulttyq qaıyrymdylyqtyń I konferensııasynyń qorytyndy otyrysy ótti.
Konferensııa kommersııalyq emes uıymdar ókilderiniń, qor donorlarynyń, ortalyq jáne jergilikti atqarýshy organdardyń, Parlament ókilderiniń jáne halyqaralyq uıymdardyń qatysýymen zoom platformasynda uıymdastyryldy.
Qorytyndy konferensııada qordyń negizgi qyzmeti jáne elimizde qaıyrymdylyqty damytý boıynsha usynystardy ázirleý negizinde júrgizilgen jumystyń nátıjesi týraly aıtyldy. 1 shildede bastalǵan konferensııa osy ýaqyt ishinde 1 173 úkimettik emes uıym (ÚEU) ókilderiniń qatysýymen 43 zoom-konferensııa ótkizgen. ÚEU-nyń usynystaryn zerdeleý maqsatynda ÚEU úshin onlaın-saýaldama iske qosylyp, oǵan 1 041 respondent qatysqan. Qordyń basqarma tóraǵasy Bolat Jámishev jurtshylyq aldynda qordyń jańartylǵan tujyrymdamasy men prospektisin tanystyryp, Úkimetke úndeý jáne konferensııa deklarasııasy qabyldanǵanyn aıtty. Tujyrymdamanyń qoldanystaǵy redaksııasyn daıyndaýda Memleket basshysynyń 11 qańtarda Parlament Májilisiniń otyrysynda «Qazaqstan halqyna» qoryn qurý týraly tapsyrmasy negiz bolǵan. Qor qaıyrymdylyq salasynda iri jeke kapıtaldyń turaqty aǵymyn qamtamasyz etetin donorlyq pen qaıyrymdylyq ekojúıesiniń draıverine aınalý úshin qoǵamdyq sektor uıymdarynyń kómegimen qaıyrymdylyq baǵdarlamalary ázirlenip, iske asyrylady.
«Qazaqstan halqyna» qory kúrdeli kezeńderde halyqty materıaldyq-tehnıkalyq qural-saımandarmen jabdyqtaý, resmı jáne beıresmı bilim berýdi ilgeriletýge járdemdesý, halyqqa áleýmettik qyzmetter kórsetýdiń qoldanystaǵy júıeleriniń tıimdiligin arttyrýǵa qatysý, áleýmettik ınnovasııalardy qoldaý, aıryqsha jaǵdaılarda jekelegen azamattarǵa jáne tótenshe jaǵdaılar kezinde keshendi kómek kórsetý aıasynda alty baǵyt boıynsha jumys júrgizedi.
Infografıkany jasaǵan Amangeldi Qııas, «EQ»
Konferensııa barysynda Aqparat jáne qoǵamdyq damý vıse-mınıstri Danııar Qadyrov pen «Qazaqstan halqyna» qorynyń qamqorshylyq keńesiniń tóraǵasy Qaıyrbek Súleımenov sóz alsa, plenarlyq sessııada qaıyrymdylyq salasyndaǵy negizgi máseleler jóninde qoǵamdyq qordyń qamqorshylyq keńesiniń múshesi, Help Today qoǵamdyq qorynyń tóraǵasy Elmıra Álıeva, aýyldyq aýmaqtardy qoǵamdyq damytý qorynyń úılestirýshisi Danııar Toqtarbaev, «Polımetall Eýrazııa» kompanııasynyń bas dırektory Qanat Dosmuqametov, «Bolashaq K» qoǵamdyq qorynyń dırektory Jibek Bısenova, Qoǵamdyq densaýlyq saqtaý menedjerleriniń qazaqstandyq qaýymdastyǵynyń atqarýshy dırektory Aınur Aıyphanova sóz sóıledi.
Aıta ketý kerek, Úkimetke joldanǵan úndeýde áleýmettik ınfraqurylymǵa, aýyldyq mektepterdegi bilim berýdiń, azamattardy oqytýdyń, áleýmettik qorǵaýdyń, azamattardyń jekelegen sanattaryn nysanaly qoldaýdyń nazarǵa alynýy qajet ekeni kórsetildi.
«Qazaqstan halqyna» qory osy ýaqytqa deıin qańtar oqıǵasynda qaza bolǵan áskerılerdiń otbasy men áskerıler qatarynda zardap shekken 154 adamǵa kómek kórsetken. Jaraqat alǵan 6 balanyń otbasyna qordan 18 mln teńge berilgen. Zardap shekken 19 otbasyna 133 mln teńge bólinse, jappaı tártipsizdikter kezinde qaıtys bolǵan 18 adamnyń otbasyna 126 mln teńge kóleminde qarjylaı qoldaý kórsetilgen. Qańtar oqıǵasynan zardap shekkender jóninde: «Bas prokýratýradan tizimdi kútip otyrmyz. Ol týraly Prezıdent te aıtqan. Osy aıdyń ishinde Bas prokýratýra tizimdi berse, qaza bolǵan adamdardyń otbasylaryna 7 mln teńgeden bólemiz», dedi Bolat Jámishev.
Al qańtar oqıǵasyna baılanysty Bas prokýratýranyń tizimine tirkelmeı ózdiginen kómek suraǵandarǵa kómek berile me degen suraqqa qordyń basqarma tóraǵasynyń orynbasary Lázzat Shyńǵysbaeva: «О́zdiginen ótinim beretinder kóp. Biz ony zań júzinde naqtylaý úshin Bas prokýratýraǵa óz hatymyzben qosyp jiberemiz. Olar bizge onyń kóteriliske qatysy bar-joǵyn anyqtap, dáleldegen soń ǵana kómek berý jaǵyn qarastyramyz», dedi.
Sonymen qatar «Qazaqstan halqyna» qory órtten zardap shekken qostanaılyqtarǵa turǵyn úıleri salynyp bitken soń turmysqa qajetti zattar alyp berýge kómektesetinin aıtty. Qor jańa úılerdi ınfraqurylymmen qamtýǵa da qarjy bólmek. Qor tóraǵasynyń orynbasary Lázzat Shyńǵysbaeva qorǵa 150 mlrd teńge túskenin aıtyp, alaıda qor qorjynyndaǵy ótinimderdiń 40%-y densaýlyq saqtaýǵa baılanysty bolǵandyqtan bul sala máselelerine basymdyq berilip, kómek eń aldymen sırek kezdesetin dári-dármekterdi qajet etetinderge kórsetiletindigin tilge tıek etti.
Bilim berýge qatysty barlyq joba, bilim granttary da aýyldyq jerdegi oqýshylarǵa eseptelse, beıimdelgen sport jobasy boıynsha aýyldyń da, qalanyń da balalary qarastyrylǵan. Tek turǵyn úı jáne nesıe tólemeý máselelerine qatysty 40 myń ótinishi bar «Qazaqstan halqyna» qory mádenıet salasyna ázirge kómek kórsetilmeıtindigin aıtady.