Fýtzaldan Qazaqstan ulttyq quramasy 2024 jyly ótetin álem chempıonatynyń negizgi irikteý kezeńiniń oıyndary aldynda Aqtaýda Ázerbaıjan quramasymen joldastyq match ótkizip, 5:3 esebimen jeńiske jetti.
Rıkardo Kaka jattyqtyratyn qazaqstandyq fýtzalshylar kezdesýdiń alǵashqy kezeńinde 0:2 esebimen jeńilip jatyp, match sońynda tamasha kambek jasady. Qazaqstan quramasy sapynan «Qaırat» oıynshylary Albert Aqbalyqov, Edson jáne Dýglas gol soǵyp, Aqtaýdaǵy «Halyq Arena» sport keshenine jınalǵan fýtzal jankúıerlerin qýanyshqa bóledi. Edson het-trıktiń avtory atansa, Aqbalyqov pen Dýglas Ázerbaıjan qaqpasyna bir goldan saldy.
Sondaı-aq match barysynda qazaq fýtzalynyń ańyzyna aınalǵan Dinmuhamed Súleımenov karerasyn birer jyl buryn aıaqtaǵan bolsa da, alańǵa shyǵyp, ulttyq qurama sapyndaǵy 100-shi oıynyn ótkizdi. 41 jastaǵy ardager fýtbolshyǵa federasııa tarapynan arnaıy qurmet kórsetildi. Aıta keteıik, ulttyq qurama 8 qazan kúni álem chempıonatynyń negizgi irikteý kezeńindegi alǵashqy oıynyn óz elimizde Slovenııamen ótkizedi.