Premer-Mınıstr Álıhan Smaıylov memlekettiń júıeli sharalary densaýlyq saqtaýdyń sapasy men qoljetimdiligin arttyrýǵa baǵyttalǵanyn aıtty, dep habarlaıdy Egemen.kz.
«Bizdiń mindetimiz – árbir azamatty sapaly ári qoljetimdi medısınalyq kómekpen qamtamasyz etý. Ol úshin densaýlyq saqtaý nysandaryn salýǵa, medısınalyq qural-jabdyqtar satyp alýǵa, zamanaýı tehnologııalardy engizýge, kadrlardy daıarlaýǵa qomaqty qarjy bólinýde. Qymbat medısınalyq tekserýler qoljetimdi boldy. Onyń ishinde magnıtti-rezonansty tomografııa, kompıýterlik tomografııa tekserýleri qoljetimdi boldy», dedi Premer-Mınıstr Úkimet otyrysynda.
Sondaı-aq Úkimet basshysy ótken jyly Ortalyq Azııa elderinde aýrýlardy radıohırýrgııalyq jolmen emdeýge arnalǵan alǵashqy Gamma-pyshaq ortalyǵy ashylǵanyn eske saldy.
«Medısına qyzmetkerleriniń jalaqysy aıtarlyqtaı ósti. Bıyl dárigerlerdiń ortasha jalaqysy 420 myń teńgeni, orta medısına qyzmetkerleriniń jalaqysy 234 myń teńgeni qurady. Dáriger mamandyǵy tartymdy ári bedeldi bolyp keledi», dedi Álıhan Smaıylov.
Premer-Mınıstr sondaı-aq Memleket basshysynyń tapsyrmasy boıynsha «Aýyldyq densaýlyq saqtaýdy jańǵyrtý» pılottyq jobasy ázirlenip jatqanyn aıtty. 2025 jylǵa qaraı aýyldyq jerlerde 650 alǵashqy medısınalyq-sanıtarlyq kómek kórsetý nysanyn salý josparlanýda. Sondaı-aq olar 32 aýdandyq aýrýhanany jańǵyrtýdan ótkizedi.
Álıhan Smaıylov atap ótkendeı, bul júıeli sharalar densaýlyq saqtaýdyń sapasy men qoljetimdiligin arttyrýǵa baǵyttalǵan.