Qazaqstandyq dıplomattar qonaqtarǵa qazaq-cheh mádenı-gýmanıtarlyq yntymaqtastyq salasyndaǵy jetistikteri týraly egjeı-tegjeıli aıtyp berdi, dep habarlaıdy Egemen.kz SIM baspasóz qyzmetine silteme jasap.
«Qazaqstannyń mádenıet kúnderi Qazaqstan men Chehııa arasyndaǵy ekijaqty baılanystardy nyǵaıtýǵa eleýli úles qosady, mundaı sharalar bizdiń ýaqytta mańyzdy. Qazaqstan mádenıeti kóp qyrly jáne biregeı», deıdi Chehııa Mádenıet mınıstrligi Halyqaralyq qatynastar departamentiniń dırektory Petr Hnızdo.
Cheh kórermender ár túrli mýzykalyq jáne óner ujymdarynyń qoıylymdaryn tamashalaýǵa múmkindik aldy. Festıval aıasynda «Qazirgi Qazaqstan» fotokórmesi, «Meniń Otanym - Qazaqstan» balalar sýretteriniń kórmeleri uıymdastyryldy.
Festıvaldiń ashylý saltanaty baǵdarlamasynyń konserttik bóliginde Orta Azııa halyq folklorlyq toptary, qazaq kúıleriniń oryndaýshylary óner kórsetti, al Pragada oqyp jatqan qazaq stýdentteri belgili qazaq shyǵarmalaryn oryndady.
Festıval eki aptaǵa sozylady, onyń aıasynda qazaqtyń belgili qoǵam jáne saıası qaıratkerleri, aqyn-jazýshylar, memleket qaıratkerleri Qanysh Sátbaev, Júsipbek Aımaýytov, Shoqan Ýálıhanov, «Alash» qoǵamdyq-saıası qozǵalysynyń jetekshisi Ahmet Baıtursynovqa arnalǵan derekti fılmder kórsetiledi jáne Qazaqstannyń táýelsizdik jyldaryndaǵy jetistikteri men Semeı ıadrolyq polıgonynyń jabylýynyń 30 jyldyǵyna arnalǵan fotokórmeler ótedi.