Eldiń saıası-ekonomıkalyq damýyna enjar qaramaıtyn kez kelgen adam Joldaýdy úmitpen kútetini anyq.
Bul jolǵy Joldaýda Memleket basshysynyń «Balalarǵa arnalǵan ulttyq qor» baǵdarlamasyn iske qosý týraly ıdeıasy unady. Kámelettik jasqa tolǵannan keıin jınaqtalǵan soma turǵyn úı satyp alýǵa jáne bilim alýǵa jumsalady. Jalpy, bul bastama onshaqty jyl aıasynda elimizde kedeıliktiń sheginde turǵan kópbalaly otbasylar jaǵdaıyn jaqsartady. Osy arqyly Qazaqstan halyqtyń bárine birdeı teń múmkindikter jasaýǵa jaqyndaı túsedi.
Memleket basshysynyń mektepke deıingi bilim beretin uıymdy emes, tárbıeshini attestattaýdan ótkizý týraly pikiri de osy sala mamandarynyń oıyn dóp basty. Shynymen de, balamen tikeleı jumys isteıtin tárbıeshilerdi attestattamaı, is alǵa baspaıdy. Biraq balabaqsha quryltaıshysy retinde men tárbıeshilerge qoıylatyn talaptardyń qazirgi zamanǵa saı jáne naqty iske qatysty ekendigine senimdi bolýym kerek. Qazirgi mektepke deıingi uıymdarda jumys isteıtin kadrlardyń teń jartysynan astamy bilim, tájirıbe jaǵynan aqsap tur. Sondyqtan da tárbıeshiler úshin attestattaýǵa deıin biliktiligin arttyratyn tegin kýrstar uıymdastyrylǵany jón. О́ıtpegen jaǵdaıda biz kadrlardyń teń jartysynan aıyrylyp, balamen jumys isteıtin adam tappaı qalýymyz ǵajap emes.
Qalalyq máslıhat depýtaty retinde men Qazaqstan Respýblıkasy Prezıdentin kezekten tys saılaý jónindegi bastamany da qoldaımyn. Sonymen qatar 2023 jyly ótetin máslıhattar saılaýynda el senimin arqalaýǵa daıynmyn. Al saılaýlar ádil ótýi kerek. Bul – eldiń erteńgi kúnge degen úmiti men senimi.
Anar IZDEN,
«Oblystyq ÚEU alıansy assosıasııasy» qaýymdastyǵynyń tóraıymy,
qalalyq máslıhat depýtaty