Jastarǵa arnalǵan turǵyn úı baǵdarlamasynyń jobasy ázirlenedi. «Jastar» ǵylymı-zertteý ortalyǵy men «Otbasy bank» AQ qazaqstandyq jastar úshin turǵyn úı nesıesiniń qolaıly sharttaryn jáne turǵyn úı jaǵdaılaryn jaqsartý qajettiligin aıqyndaý boıynsha birlesip zertteý júrgizbek.
Zertteý negizinde biryńǵaı jastar turǵyn úı baǵdarlamasynyń arnaıy jobasy ázirlenedi. Atalǵan zertteý jumysyna negiz bolǵan «Jastar» ǵylymı-zertteý ortalyǵynyń arnaıy júrgizgen saýaldamasyndaǵy «Sizdiń oıyńyzsha, jastar ózderin senimdi sezinip, damýǵa qabiletti bolý úshin ne qajet?» degen suraqqa respondentterdiń 40,9 paıyzy «О́z baspanasy» dep jaýap bergen. О́z kezeginde «Otbasy bank» AQ óńirlik ákimdiktermen birlese otyryp, jastarǵa arnalǵan derbes baǵdarlamalardy iske qosýda. Bul – «Elorda jastary», «Almaty jastary», «Qaraǵandy jastary», «Áýlıeata jastary», «Qostanaı jastary». Jaqyn arada osyndaı baǵdarlama Atyraýda da («Atyraý jastary») júzege aspaq.
О́ńirlik turǵyn úı baǵdarlamalaryna qatysý úshin irikteý krıterııleri ár óńirge baılanysty ózgerip otyrýy múmkin. Nesıe berý sharttary ádette standartty bolyp tabylady: bastapqy jarna keminde 10 paıyz bolý kerek, nesıe mólsherlemesi jyldyq 5 paıyz, nesıe merzimi 19 jylǵa deıin.
Jastardyń biryńǵaı turǵyn úı baǵdarlamasynyń jobasyn ázirleý «Jastar» ǵylymı-zertteý ortalyǵy men «Otbasy bank» AQ qol qoıǵan yntymaqtastyq týraly memorandým negizinde júzege asady.
Elimizdegi statıstıkaǵa súıensek, 18 ben 29 jas aralyǵynda jastardyń sany 4,5 mıllıonǵa jýyq. Al endi atalǵan sanatqa jatpaıtyndar qaıtpek? Belgili bolǵandaı, «Otbasy bankinde» 2003 jyly bank ashylǵaly jınaq júıesi júrgiziledi. Azamattar óz atynan esepshot ashyp, kemi úsh jyl ishinde alǵysy keletin úı qunynyń 50 paıyzyn jınap bitirse, baǵalaý kórsetkishin belgili bir mólsherge jetkizse (eń tómengisi 16), onda 5 paıyzdan 3,5 paıyz aralyǵynda úıdi nesıege rásimdeı alady. Bul – jalpyǵa qoljetimdi baǵdarlama. Jınaq jasaý ýaqyty mólsherine kelsek, árkim qaltasyna qaraı kósiledi. Eń tómengi merzim úsh jyl bolyp sanalady. Úıdi nesıege rásimdeýge 18 jastan asqan azamattyń keminde 6 aılyq tabysy bolýy talap etiledi. «Tabys kózin rastaǵan 18 jastan asqan azamat úı alýy úshin ata-anasy jastaıynan atyna esepshot ashyp, aqsha salyp otyrsa, ýaqytty azaıta alady», deıdi mamandar.