Búgin fýtboldan Qazaqstan ulttyq quramasy Ulttar lıgasy týrnıri aıasyndaǵy besinshi týr oıynyn elordada Belarýs quramasymen ótkizedi. Eki el quramalarynyń arǵy-bergi tarıhyna úńiler bolsaq, búginge deıin Qazaqstan men Belarýs quramalary resmı matchtarda bes márte kezdesip, ókinishke qaraı, 4 ret jeńilip, 1 márte teń túsken ekenbiz. Al búgingi altynshy matchta jerlesterimiz tarıhı jeńiske qol jetkize ala ma?
Qazaqstan men Belarýs quramalarynyń tanystyǵy 2009 jyly bastaldy. Sol jyly Eýropa chempıonatynyń irikteý kezeńinde bir topta óner kórsetip, eki matchta da qarsylastar basym tústi. 1 sáýirde Astanada ótken kezdesýde 1:5 esebi tirkelse, qyrkúıektegi qarymta oıynda alań ıeleri 4:0 esebimen jeńiske jetti. Keıinnen araǵa 11 jyl salyp eki eldiń fýtbolshylary Ulttar lıgasy týrnırinde qaıta jolyqty. О́kinishke qaraı, bul kezdesýlerde de Belarýs quramasyna shamamyz jetpedi. Almatydaǵy básekede 1:2 esebimen jol bersek, qarymta oıynda 2:0 nátıjesimen jeńildik.
Keshe eki eldiń bas bapkerleri oıyn aldyndaǵy baspasóz máslıhatyn ótkizdi. Belarýs quramasynyń bas bapkeri Georgıı Kondratev óz komandasynyń jeńisine senimdi.
«Shákirtterim Qazaqstanǵa joǵary daıyndyqpen keldi. Bizdiń quramada qazaqstandyq fýtbolshylardy, Qazaqstan birinshiligin jaqsy biletin Ebong, Iýdenko jáne Polıakov sekildi oıynshylar bar. Olar búgingi oıynda mańyzdy ról atqarady dep oılaımyn. Serbııada ótken eki qurama arasyndaǵy sońǵy oıynda biz barlyq kórsetkish boıynsha qazaqtardan alda boldyq. Soqqy baǵyttaý, buryshtamalar oryndaý, dopqa ıelik etý, barlyq jaǵynan basym tústik. Bul joly da shabýylda oınaımyz, bizdiń komandanyń jeńetindeı shamasy bar», deıdi ol.
Al Qazaqstan ulttyq quramasynyń qaqpashysy Igor Shaskıı Belarýs quramasyn jeńip, barlyq máselege núkte qoıýǵa tyrysamyz deıdi. «Elordadaǵy oqý-jattyǵý jıyny josparly túrde júrip jatyr. Ony jattyqtyrýshylar quramy óte jaqsy oılastyrǵan. Jigitterdiń daıyndyǵy da, matchqa degen kóńil kúıleri de óte joǵary. Belarýs quramasyn osy joly jeńýge tyrysamyz. Árıne, matchtyń ońaıǵa soqpaıtyny belgili, biraq osy kezdesýde barlyq máselege núkte qoıýǵa umtylamyz», deıdi qaqpashy.
Aıta keteıik, Belarýs pen Qazaqstan quramalary arasyndaǵy alǵashqy oıyn Serbııada ótip, kezdesý 1:1 esebimen teń aıaqtalǵan bolatyn. Birinshi taımda Qazaqstan quramasy esepte alda bolǵanymen, kezdesýdiń sońǵy mınýttarynda gol ótkizip, jeńisti ýysynda saqtaı almady.