Munaıly shahardaǵy Talqaırań shaǵyn aýdanynda 900 oqýshyǵa arnalǵan jańa mekteptiń qurylysy bastaldy. Eki jyldan soń paıdalanýǵa beriletin bul bilim ordasynyń ádettegi mektepke uqsamaıtyn ereksheligi kóp.
Jańa mekteptiń qurylysyn salý úshin 3 gektar jer telimi bólingen. Al ereksheligine toqtalsaq, bilim oshaǵynda úsh blok josparlanyp otyr. Birinshi blokta 1-4 synyp, ekinshi blokta 5-9 synyp, úshinshi blokta 10-11 synyp oqýshylary bilim alady dep kútilýde. Bilim ordasynda 210 oryndyq májilis zaly, 312 oryndyq ashana, eki sport zal men eki kitaphana, medısınalyq beket bolady. Al árqaısysy 25 oqýshyǵa arnalǵan 36 synyp kabıneti zamanaýı úlgide jasaqtalady.
– Memleket basshysy Qasym-Jomart Toqaev Qazaqstan halqyna Joldaýynda «Orta bilimniń sapasy – tabysty ult bolýdyń taǵy bir mańyzdy sharty. Árbir oqýshynyń bilim alyp, jan-jaqty damýy úshin qolaıly jaǵdaı jasalýǵa tıis. Jalpy, mektep salý Úkimet jáne ákimdikter úshin basty mindettiń biri bolýy kerek» degen edi. Biz osy mindetti júzege asyrý úshin taǵy bir jańa bilim oshaǵynyń irgetasyn qaladyq. Basty mindetimiz – qurylys jumystarynyń merziminde sapaly atqarylýyna qol jetkizý. El bolashaǵy – bilimdi urpaq degen qaǵıdaǵa súıensek, bul is – sol jolǵa jumsalǵan ınvestısııa, – deıdi oblys ákimi Serik Shápkenov.
Mekteptiń syrtqy aýmaǵy abattandyrylyp, fýtbol alańy, júgirý joly, sporttyq trenajer, tennıs korty men voleıbol alańy bar stadıon salý josparlanyp otyr. Sondaı-aq alǵashqy áskerı daıyndyq sabaǵyna arnalǵan keńistik jasalady. Bilim ordasyna oqýshylardy tasymaldaıtyn avtobýs pen jeke, onyń ishinde múmkindigi shekteýli adamdardyń kólikteri úshin avtoturaq ashylady.
Atyraý oblysy