Pavlodarlyq polıseıler qala mektepteriniń birine jarylǵysh zat qoıylǵany týraly jalǵan aqparat taratqan oqýshyny qolǵa túsirdi. Kámeletke tolmaǵan bala osyndaı qadamǵa synyptastarymen bástesip barǵanyn moıyndady, dep habarlaıdy Egemen.kz Polisia.kz-ke silteme jasap.
21 qyrkúıek kúni Pavlodar oblysynyń Tótenshe jaǵdaılar departamentine belgisiz bireý qala mektepteriniń birine terrorıster kirip, jarylǵysh zat qoıyp ketkeni týraly habarlama tústi.
«Akademık Shókın, 27 kóshesindegi Baýyrjan Momyshuly atyndaǵy JOBBM-de terrorıster bar», delingen habarlamada.
Kórsetilgen mekenjaıǵa shuǵyl qyzmetter jiberilip, myńnan astam oqýshy men personaldyń 83 múshesi evakýasııalandy. Al saperler mektepke tekserý júrgizdi.
Oblystyq PD baspasóz qyzmeti mamandar mektepte jarylǵysh zat tappaǵanyn habarlady. QR QK 273-baby boıynsha sotqa deıingi tergeý bastaldy.
«Jalǵan habarlaý faktisine qatysy bar tulǵany anyqtaý boıynsha is-sharalar óz jemisin berdi, al Pavlodarlyq polıseıler kóp uzamaı kinálini ustady. Ol sol mekteptiń oqýshysy bolyp shyqty», delingen habarlamada.