Halyqtyń qalaýymen Nur-Sultan qalasy qaıta Astana bolyp bekidi. Bul da – bir tarıhı oqıǵa. Tereńnen tartsańyz, talaı ret aty jańarǵan ásem shaharǵa Astana esimi ár berip turǵandaı. Aıtýǵa ońaı hám astarly. Ásirese jastardy erekshe kúıge bóleıdi. Muny «Meniń qalamnyń tarıhy» atty ekskýrsııalyq kórmede baıqadyq.
«Arhıv jáne bolashaq urpaq» jobasynyń negizinde júzege asqan, mektep oqýshylaryna arnalǵan kórme kóptiń kóńilinen shyqty. Balalar qala shejiresine qanyǵyp, fotosýretterdi tamashalady. Jalpy, ıgilikti sharaǵa muryndyq bolǵan Astana qalasynyń memlekettik arhıvi men Mádenıet jáne sport mınıstrliginiń Arhıv isteri jáne qujattamany basqarý komıteti.
Is-sharanyń negizi maqsaty – balalardyń Otanǵa degen súıispenshiligin oıatý. Sondaı-aq elordamyzdyń qalyptasý tarıhymen jaqyn tanystyryp, patrıotızmge tárbıeleý. Rasynda jastar ózderiniń súıikti qalasynyń tarıhyn tereńinen tanyp túısinetin bolsa, ótkenge qurmetpen qaraıtyny anyq. Osy oraıda uıymdastyrylǵan kórmeniń oqýshylarǵa berer qundylyǵy kóp. О́tpeli kezeńder men aıshyqty oqıǵalar, sáýlet keshenderi, ǵajaıyp ǵımarattardyń bári ýaqyttyń jańǵyryǵy ispetti. Júrekke jylylyq quıady.
Is-shara barysynda oqýshylar kórmeni qyzyǵa tamashalady. Mamandarǵa suraqtar qoıyp, ózderine qyzyq ári kerek aqparattarǵa qanyqty. Uıymdastyrýshylar tarapynan vıktorınalyq saýaldarǵa durys jaýap bergen oqýshylarǵa «Elorda – Táýelsizdik sımvoly» atty kitap syıǵa tartyldy.