Qazaqstan Respýblıkasyna kelip jatqan Reseı azamattarynyń artýyna baılanysty Ishki ister mınıstrliginiń Kóshi-qon qyzmeti málimdeme jasady, dep habarlaıdy Egemen.kz.
«Qazaqstanda mıgranttardyń kelýi men bolýy Kóshi-qon baqylaýynda. Sheteldikterdiń Qazaqstanda bolý tártibi zańmen retteledi. Birde-bir shetel azamaty kóshi-qon zańnamasynyń talaptaryn oryndamaı, memleketimizdiń aýmaǵynda bolýǵa quqyǵy joq. Eýrazııalyq ekonomıkalyq odaqqa múshe memleketterdiń azamattary úshin Qazaqstan Respýblıkasynda bolýdyń ruqsat etilgen merzimi memlekettik shekaradan ótken kúnnen bastap, ortaq ereje boıynsha 90 kúnnen keıin aıaqtalady. Mıgranttardy tirkeýdi ishki ister organdary qabyldaýshy taraptardyń málimetteri men Qazaqstan Respýblıkasynyń Ulttyq qaýipsizdik komıtetiniń sheteldikterdiń kirýi men shyǵýyn esepke alatyn Memlekettik shekara arqyly ótkizý pýnktterinen biryńǵaı derekqorǵa ýaqytyly túsetin málimetteri negizinde júzege asyrady», dedi IIM Kóshi-qon qyzmeti komıteti tóraǵasynyń m.a. Aslan Atalyqov.
Statıstıkaǵa súıensek, bıyl Qazaqstanǵa 4,3 mln-ǵa jýyq sheteldik kelse, 4,1 mln-y ketken. Onyń ishinde 1 660 000 Reseı Federasııasynyń azamattary kelgen jáne 1 640 000 ketken.
«Olardyń ýaqytsha bolýy esepte. Árqaısysynyń tólqujat derekteri men kirý kúnderi, olar týraly tolyq aqparat bar. Kóshi-qon prosesterine monıtorıng júrgizilýde. Ishki ister organdary kelýshilerdiń belgilengen bolý erejeleriniń saqtalýyn baqylaýda. Sheteldiktiń elde bolý merzimi aıaqtalsa, oǵan qatysty zańda kózdelgen sharalar qoldanylady. Baqylaý barysynda kóshi-qon zańnamasyn buzǵan 45 700 adam ákimshilik jaýapkershilikke tartylyp, onyń 4200-i májbúrli túrde Qazaqstannan shyǵaryldy. Onyń ishinde kóshi-qon zańnamasyn buzǵan 3200 reseılik jaýapqa tartylǵan. Bul elge kelgen Reseı Federasııa azamattarynyń tek nól bútin onnan eki paıyzyn quraıdy. Bul statıstıka olardyń Qazaqstanda bolý sharttaryn saqtaý tártibin kórsetedi. Eger ony buzǵan jaǵdaıda Qazaqstannan májbúrlep shyǵarý 5 jyl merzimge elimizge qaıta kirýge tyıym salý túrindegi qosymsha sanksııany qarastyrady. Sol sııaqty ishki ister organdary sheteldikterdiń Qazaqstanda bolý tártibiniń saqtalýyn ýaqytsha turýǵa berilgen ruqsat negizinde baqylaıdy», dedi A.Atalyqov.
Onyń aıtýynsha, ýaqytsha turýǵa ruqsat sheteldikke Qazaqstan Respýblıkasynda zańda kózdelgen eńbek sharty, oqý, emdelý jáne basqa da jan-jaqty negizderde bolý quqyǵy beriledi.
«Kóshi-qon qyzmeti olardyń turǵylyqty mekenjaıy, turǵyn úıdiń ıesi jáne onda turatyn sheteldikter týraly tolyq aqparat boıynsha ımmıgrasııalyq baqylaýdy qamtamasyz etedi. Shekarany zańsyz ótýge, el aýmaǵynda tirkeý úshin qujattardy resimdeý tártibin buzýǵa baılanysty kez kelgen jaǵdaı Qazaqstan Respýblıkasynyń zańnamasyna sáıkes joly kesiledi. Qazaqstan Respýblıkasynyń Kóshi-qon qyzmeti shtattyq rejımde jumys isteýde. Sheteldikterdiń, ýákiletti memlekettik jáne quqyq qorǵaý organdarynyń zańdylyqty saqtaýyn baqylaý júzege asyrylýda», dedi IIM Kóshi-qon qyzmeti komıteti tóraǵasynyń mindetin atqarýshy.