Qazaqstan Prezıdenttigine kandıdattardyń árqaısysyna onyń úgit-nasıhat jumystaryn qoldaý úshin bıýdjetten teńdeı qarajat bólinedi. Aldyn ala esepteýler boıynsha bul soma 10 mln teńgeni quraıdy, dep habarlaıdy Egemen.kz.
«Bizde aldyn ala esepteýler bar. Barlyq tarıfter boıynsha BAQ úshin (kandıdattardy teledıdardan, radıodan shyǵady, baspa basylymdaryna ornalastyrady), úı-jaıdy, kólikti jalǵa alý, ár kandıdatqa shamamen 10 mln teńge bólinedi. Bul másele boıynsha Úkimettiń sheshimi men Ortalyq saılaý komıssııasynyń sheshimin áli alǵan joqpyz. Bul josparly shyǵyndar», dep túsindirdi Ortalyq saılaý komıssııasynyń múshesi Sábıla Mustafına.
Buǵan deıin habarlaǵandaı, Memleket basshysy Qasym-Jomart Toqaev Qazaqstan Respýblıkasy Prezıdentiniń kezekten tys saılaýyn taǵaıyndaý týraly jarlyqqa qol qoıǵan bolatyn. Saılaý 20 qarashada ótedi. Qazaqstan Respýblıkasy Prezıdenttigine kandıdattar úshin saılaý jarnasynyń mólsheri búginde 3 mıllıon teńgeni quraıdy.