Búgin, qyrkúıektiń sońǵy jeksenbisinde elimizde mashına jasaý kúni atalyp ótiledi, dep habarlaıdy Egemen.kz.
Kásibı mereke alǵash ret 1981 jyly KSRO kezinde toılanǵan. Keńes odaǵy taraǵannan keıin bul merekeni Belarýs, Qyrǵyzstan, Reseı óz kúntizbelerinde qaldyrdy.
2017 jylǵy 31 qazanda sol kezdegi Qazaqstan Respýblıkasynyń Premer-Mınıstri Baqytjan Saǵyntaev QR Úkimetiniń № 689 qaýlysyna qol qoıdy. «Qazaqstan Respýblıkasyndaǵy merekelik kúnderdiń tizbesin bekitý týraly» atalǵan qaýlyda qyrkúıektiń sońǵy jeksenbisi Mashına jasaýshy kúni retinde bekitilgen.
Búgin ataýly merekemen Indýstrııa jáne ınfraqurylymdyq damý mınıstri Qaıyrbek О́skenbaev quttyqtady.
«Mashına jasaý salasy elimizdiń óńdeýshi sektorynda jetekshi ról atqaryp, ekonomıkanyń damýyna eleýli úles qosyp keledi. Búginde atalǵan sala ındýstrııalyq damý baǵdarlamalarynyń basym baǵyty retinde aıqyndalyp otyr. Indýstrııalandyrý jyldary mashına jasaýdaǵy óndiris kólemi 376 mlrd teńgeden ótken jyly 2,3 trln teńgege deıin ulǵaıyp, 6 esege artqan.
Jańa zamannyń syn-qaterleri óndiristik yntymaqtastyqty nyǵaıtýdy, ónimdi qaıta óńdeý dárejesin tereńdetýdi jáne ınnovasııalyq tehnologııalardy engizýdi talap etedi. Osy rette Sizderge alǵa qoıǵan maqsattaryńyzǵa jetýge múmkindik beretin kásibı daǵdylaryńyz, tájirıbelerińiz ben biliktilikterińiz jetkilikti dep sanaımyn.
Boılaryńyzǵa sarqylmas kúsh-qýat, otbasylaryńyzǵa amandyq tileımin!», dedi mınıstr.