WBO nusqasy boıynsha orta salmaqta álem chempıony atanyp otyrǵan qazaqtyń kásipqoı boksshysy Jánibek Álimhanuly óziniń kelesi kezdesýin 12 qarashada AQSh-tyń Las-Vegas qalasynda ulybrıtanııalyq Denzel Bentlımen ótkizedi.
Denzel 1995 jyldyń 29 qańtarynda Ulybrıtanııanyń astanasy – Londonda týyp-ósken. Kásipqoılar arasynda judyryqtasyp júrgenine bes jyl boldy. Sol aralyqta 19 kezdesý ótkizip, 17 ret jeńiske jetti. 14 qarsylasyn esinen tandyrdy. 2020 jyldyń kúzińde ol Mark Hefronmen teń tússe, 2021 jyldyń kókteminde Felıka Keshtan oısyraı utyldy. Bul jekpe-jek úshinshi raýndta toqtatyldy. Bentlı óziniń sońǵy úsh básekesinde Sem Evans, Lınýs Ýdofııa jáne Markýs Morrısson syndy tanymal bylǵary qolǵap sheberlerinen basym tústi. Onyń kásipqoı bokstan óz eliniń eki dúrkin chempıony degen ataǵy bar.
Orta salmaqtylardyń reıtınginde 14-orynda turǵan Denzel Bentlı Jánibek Álimhanuly altyn belbeýdi ıelengen bette ony jekpe-jekke shaqyrǵan edi. Qandasymyz onyń bul usynysyn qabyldady. Mine, endi qazaqtyń uly álem chempıony retinde óziniń alǵashqy jekpe-jegin 12 qarashada ótkizedi.
Esterińizge sala keteıik, 29 jastaǵy Jánibek ústimizdegi jyldyń 21 mamyrynda ulybrıtanııalyq Dennı Dıgnýmdy ekinshi raýndta uryp jyǵyp, «ýaqytsha chempıon» ataǵyn ıelengen bolatyn. Tamyz aıynyń aıaǵynda ol WBO-nyń tolyqquqyly chempıony atandy. Sebebi sol kúnge deıin teńdessiz dep tanylyp kelgen amerıkalyq Demetrıýs Andrade óz ataǵyn qorǵaýdan bas tartyp, basqa salmaqqa aýysty.