Aýstralııanyń Výllongong qalasynda tas joldaǵy velosporttan álem chempıonaty aıaqtaldy. Básekeniń sońǵy kúnin eresekter 266,9 shaqyrymdyq jaryspen qorytyndylady.
Bul synda belgııalyq Remko Evenepýl aldyna jan salmady. Ulttyq qurama kóshbasshysy Alekseı Lýsenko márege 35 shaqyrym qalǵanda negizgi toptan qara úzip, Remko Evenepýldyń sońyna túsken edi. Alaıda sońǵy sátte olardy peleton qýyp jetip, Alekseı márege nebári 24-shi bolyp jetti. Ol jeńimpazdan 2 mınýt 21 sekýnd qalyp qoıdy. Qazaqstan quramasynyń ózge ókilderi Vadım Pronskıı men Iýrıı Natarov márege jete almady.
Bıylǵy dodada qazaqstandyq veloshabandozdar 1 altyn medal oljalap, jalpykomandalyq esepte Jańa Zelandııamen birge 8-oryndy bólisti. Jalǵyz júldeni 23 jasqa deıingi velosportshylar arasyndaǵy synda Evgenıı Fedorov jeńip aldy. Aqtóbeniń týmasy 170 shaqyrymdy 3 saǵat 57 mınýt
8 sekýndta basyp ótip, eshkimge des bermegen edi. Aýstralııadaǵy álem chempıonatynda 13 memlekettiń qorjynyna júlde tústi.