Batys Qazaqstan oblysy Aqjaıyq aýdanyna qarasty Bazartóbe aýyldyq okrýginde XVIII ǵasyrda ómir súrgen tarıhı tulǵalar – Shaǵyraı Jádikuly men Oraq Qaıypulyna kesene ornatyldy.
Kishi júzdegi Baıuly birlestiginiń aǵasy sanalatyn sherkesh rýynyń uranyna aınalǵan Shaǵyraı batyrǵa jáne el-jurt qasterleıtin Oraq áýlıege arnap salynǵan qos keseneniń ashylý saltanaty jalpyhalyqtyq toıǵa aınalyp ótti. Jaıyq ózeni jaǵasynda ornalasqan Qadyrqul aýylynyń mańyna Batys Qazaqstan, Atyraý jáne Mańǵystaý óńirinen arnaıy otaý úıler tigilip, arýaqty atalarǵa as berildi. Saýapty sharanyń qurmetti qonaqtary qatarynda KSRO jáne Qazaqstan Respýblıkasynyń halyq artısi Asanáli Áshimov, kıno jáne teatr akteri, Qazaqstannyń eńbek sińirgen artısi Merýert О́tekeshova, Qazaqstan Jazýshylar odaǵynyń múshesi, shejireshi Pernebaı Dúısenbın, Atyraý oblysynyń eks-ákimi Mahambet Dosmuhambetov, eks-senator Sársenbaı Eńsegenov, burynǵy Májilis depýtaty Bolat Qonarbaı, Kazenergi kompanııasynyń tóraǵasy Kenjebek Ibrashev, kásipker Tóken Jumaǵulov jáne basqalary boldy. Saltanatty jıynda Batys Qazaqstan men Atyraý oblystarynan kelgen óner ujymdary, jekelegen ónerpazdar jınalǵan halyqqa án men jyrdan shashý shashty.
- Bul 2014 jyldan beri bastalǵan jumystarymyzdyń alǵashqy nátıjesi. Sol jyly «Shaǵyraı» qoǵamdyq qory qurylyp, el qamyn jegen erlerdiń esimin máńgi este qaldyrýǵa baılam jasalǵan bolatyn. Barlyq sharýa halyqtyń kúshimen, qoldaýymen boldy. Eń aldymen, osy jerdiń jergilikti halqyna, osy óńirde uzaq jyl mal baǵyp, Oraq áýlıe atamyzdyń esimin saqtap, qurmettegen marqum Saıasat Sálimov aǵamyzǵa, áýletine qaryzdarmyz, - dedi «Shaǵyraı» qoǵamdyq qorynynyń dırektory Erǵalı Jaqsylyq.
Alystan kóz tartatyn qos keseneniń qurylysy byltyr bastalǵan eken. Bıiktigi 12 metrlik qos eskertkishti mańǵystaýdyń appaq ulýtasynan kótergen – belgili sheber Ermuhambet Álıev. Qazaqstannyń batys óńirindegi belgili tarıhı tulǵalar – Baıbaraq batyr Qudaıqululynyń, Isataı batyr Taımanulynyń, ánshi Muhıt Meráliulynyń kesenelerin salǵan mańǵystaýlyq sheber bul joly da erekshe sheberlik tanytqany baıqalyp turdy.
- Qazaqstannyń kıeli nysandary qataryna jańadan qosylyp otyrǵan bul mekende keler jyly da úlken as berip, dala qyzyqtaryn ótkizýdi josparlap otyrmyz. Kesene mańyna tal-terek otyrǵyzylyp, saıabaqqa aınalady. Bıyl salynǵan úlken qonaq úıdiń bir bólmesinen bolashaqta tarıhı tulǵalardyń ómiri men tarıhı qyzmetinen habar beretin mýzeı ashylady. Qysy-jazy zııarat etip keletin halyqqa laıyqty qyzmet kórsetý úshin turaqty túrde shyraqshy bolady dep otyrmyz, - dedi «Shaǵyraı» qoǵamdyq qory uıymdastyrý alqasynyń múshesi Ekpin Alpamysuly.
Batys Qazaqstan