Qazaqstan Respýblıkasy Úkimetiniń qaýlysymen «L.N.Gýmılev atyndaǵy Eýrazııa ulttyq ýnıversıteti» KE AQ zertteý ýnıversıteti mártebesi berilip, oqý ordasynyń 2022-2026 jyldarǵa arnalǵan damý baǵdarlamasy bekitildi, dep habarlaıdy Egemen.kz.
Joǵary oqý ornyn transformasııalaý aldynda ýnıversıtettiń ǵylymı áleýetin arttyrý boıynsha keshendi jumystar júrgizildi. Qoldanbaly ǵylymı zertteýlerdi kúsheıtýge erekshe nazar aýdaryldy. Jalpy EUÝ álemdegi zertteý ýnıversıtetteriniń ozyq tájirıbesi negizinde zamanaýı ǵylymı-óndiristik ekojúıeni damytýdy, ony bıznespen jáne óndirispen baılanysty nyǵaıtýǵa basymdyq berip otyr.
Ýnıversıtet tarapynan júzege asyrylyp jatqan damý baǵdarlamasynyń negizgi baǵyttary – ǵylymı jáne bilim berý qyzmetiniń ıntegrasııasy, kadrlardy daıarlaý sapasyn arttyrý, ǵylymnyń, ónerkásiptiń jáne bıznestiń baılanysyn nyǵaıtý, eldiń áleýmettik damýyna úlesti arttyrý.
Ýnıversıtettiń ǵylymı ınfraqurylymyn keńeıtý aıasynda Abaı oblysynyń Kýrchatov qalasynda ornalasqan «Iаdrolyq tehnologııalar parki» AQ EUÝ-ǵa berildi. Bul Park mamandardy daıarlaý, ǵalymdardyń zertteýlerin júrgizý, ǵylymı ázirlemelerdi kommersııalandyrý alańyna aınalady. Kásiporynda stýdentterdiń praktıkalyq daǵdylaryn jetildirýge jáne ǵylymı jumyspen aınalysýǵa múmkindik beriledi.
Ýnıversıtet belsendi túrde jeke bıýdjeti esebinen jas ǵalymdardyń úlesin arttyryp, zertteýler men startap-jobalarǵa ýnıversıtettik granttar bólýge basa nazar aýdaryp otyr. Ǵylym boıynsha halyqaralyq kollaborasııany damytý maqsatynda sheteldik postdoktoranttar úshin shákirtaqylar qarastyrylǵan.
2020 jyldan bastap ýnıversıtette jalaqysy kóterilgen jáne akademııalyq júktemesi tómendetilgen «oqytýshy-zertteýshi» pozısııasy engizildi. Bıylǵy oqý jylynda mundaı mártebeni EUÝ-niń 20 jetekshi ǵalym-oqytýshylary ıelendi.
Sonymen birge bıyl qoldanbaly zertteýlermen, nátıjelerdi kommersııalandyrýmen aınalysatyn «zertteýshi-ınnovator» degen jańa pozısııa engizildi.
Jalpy ýnıversıtette ǵylymnyń qarjylandyrý kólemi birtindep artyp keledi. Bul kórsetkish memleket tarapynan ǵylymı-zertteý jumystaryn qarjylandyrý kóleminiń ulǵaıýynyń arqasynda 2 ese ósti.
Bıyl EUÝ-niń jetekshi ǵalymdary 100-den astam ǵylymı zertteýlerdi júzege asyrýda. Olar bıologııa jáne bıotehnologııa, ıadrolyq fızıka, matematıka jáne aqparattyq tehnologııalar, hımııa jáne jer týraly ǵylymdar, ınjınırıng jáne qoǵamdyq-gýmanıtarlyq ǵylymdar salalaryndaǵy 31 ǵylymı bólimsheniń jáne jetekshi ǵylymı mektepterdiń bazasynda júrgiziledi. Akademııalyq jáne ýnıversıtettik ǵylymdy biriktiretin 6 ǵylymı-bilim berý klasteri qurylǵan.
Búgingi tańda EUÝ-da ǵylymı dárejesi bar professorlyq - oqytýshylyq quramnyń úlesi 67% - dy quraıdy, al QR-da ǵylymı kadrlardyń dárejelilik ortasha kórsetkishi 35% teń. Bul rette professorlyq – oqytýshylyq quramnyń 40% - ǵa jýyǵy – 39 jasqa deıingi jas ǵalymdar. 2021 jyldyń qorytyndysy boıynsha elimizdiń 50 ǵalymy arasynda ýnıversıtettiń 9 ǵalymy «Úzdik ǵylymı kyzmetker» syılyǵyn ıelendi.
Sońǵy bes jylda EUÝ ǵalymdarynyń jarııalanymdyq belsendiligi eki esege artty. Maqalalardyń jartysynan kóbi Web of Science bazasynyń Q1, Q2 jýrnaldarynda jarııalanady. Ýnıversıtettiń jetekshi ǵalymdarynyń jarııalanymdary sala boıynsha jyl saıyn álemdegi eń kóp silteme jasalatyn 0,1% - ǵa kiredi.
Ýnıversıtette Scopus, Web of Science jáne basqa da halyqaralyq málimetter bazasyna engizilgen 17 ǵylymı jýrnal shyǵarylady.
Aıta keteıik, bıyl EUÝ QS World University Rankings 2023 halyqaralyq reıtınginde álemniń úzdik 300 ýnıversıtetteriniń qataryna enip, 277-shi orynǵa ıe boldy. Sońǵy úsh jylda ýnıversıtet bul reıtıngte 141 saty alǵa jyljydy.