Almaty ákiminiń orynbasary Arman Qyryqbaev sońǵy kúnderi Almatyǵa 5066 Reseı azamaty kelip, 4172-si ketip úlgergenin aıtty, dep habarlaıdy Egemen.kz.
О́ńirlik kommýnıkasııalar qyzmetiniń brıfınginde Arman Qyryqbaev Memleket basshysynyń tapsyrmasyna sáıkes qala ákimdigi Reseı Federasııasynan keletin azamattar sanynyń artýyna baılanysty jaǵdaıdy retteýge baǵyttalǵan birqatar sharalar qabyldap jatqanyn aıtty. Ákim Erbolat Dosaev arnaıy jospar bekitti.
«Dúrbeleńge esh negiz joq. Qolymyzda bar resmı derekterge sáıkes, kórshi elde ishinara jumyldyrý bastalǵaly beri Almaty qalasyna Reseı Federasııasynyń 5066 azamaty kelse, 4172-si osy jerden ketip úlgergen», dedi Arman Qyryqbaev.
Ákimniń orynbasary jataqhanalar baqylaýǵa alynǵanyn atap ótti.
«Osy aralyqta bizdiń jataqhanalar qyzmetine Reseıdiń 2 myńnan astam azamaty júgindi, rezervte 1000-nan astam tósek bar. Sondyqtan qalamyzǵa kelgen azamattardy ornalastyrý boıynsha eshqandaı másele joq. Qajet bolsa, qalada qosymsha úı-jaılardy ornalastyrýǵa barlyq múmkindikter bar, olar qazirdiń ózinde belgilengen. Eger óte qajet bolsa, shatyrly qalashyqtardy ornalastyra alamyz. Biraq olaı bolmaıtynyna senimdimiz», dep qosty ákim orynbasary.