«ALTEL» kompanııasy 4G LTE GSM jelisin iske qosty. Ol smartfonda LTE tehnologııasy boıynsha joǵary jyldamdyqta derekter berýdi paıdalanýǵa múmkindik beredi, sondaı-aq, daýysty qońyraýlar avtomatty túrde GSM/UMTS jelisine kóshiriletin bolady.
«Aıshylyq alys jerlerden kózdi ashyp-jumǵansha, jyldam habar alǵyzǵan» qazirgi zamanda eńbektegen baladan, eńkeıgen qarııaǵa deıin uıaly telefon ustaıtyn bolǵan. Al sol uıaly telefon búginde sóılesý ǵana emes, aqparat almasýdyń barlyq múmkindigin júzege asyratyn erekshe quralǵa aınalyp otyr. Oǵan telefonda ornalasqan sımkarta (chıp) múmkindik beredi. Iаǵnı, sol kishkentaı chıp arqyly ǵalamtorǵa qosyla alamyz. Iá, qaryshtap ketken aqparattyq tehnologııa ǵasyrynyń ǵajaıyby kóp-aq. Al onyń bári joǵaryda atalǵan osyndaı kompanııalardyń jetistikteriniń nátıjesinde júzege asýda. «ALTEL» kompanııasy usynyp otyrǵan 4G LTE GSM jelisi, mine, osy ınternet álemine erkin enip, elimizdiń kez kelgen túkpirinde otyryp-aq sapaly ári arzan baılanys ornatýǵa múmkindik bermek. Atap aıtar bolsaq, Qazaqstanda tuńǵysh ret Almaty, Astana, Qaraǵandy, Aqtóbe, Atyraý, Aqtaý, Shymkent, О́skemen qalalarynda 4G/3G/2G tehnologııalaryn bir mezgilde qoldaı alatyn konvergentti jeli tarmaqtalyp otyr. ALTEL aǵymdaǵy jyldyń qyrkúıeginde respýblıkanyń barlyq oblys ortalyqtaryn jelimen qamtıdy. 2014 jyldyń sońyna qaraı LTE/UMTS/GSM tehnologııasy negizindegi baılanys Qazaqstannyń halyq sany 50 000 adamnan asatyn barlyq qalalarynda iske qosylatyn bolady.
«ALTEL» kompanııasy 4G LTE GSM jelisin iske qosý ótken aptada Astanadaǵy «Rixos» qonaq úıinde saltantty túrde atalyp ótildi. Oǵan Baılanys jáne aqparat agenttiginiń tóraǵasy Asqar Jumaǵalıev qatysyp, sóz sóıledi. Ol jeliniń iske qosylýy elimiz úshin úlken jańalyq ekenin aıta otyryp, bul kórsetiletin qyzmet sapasyn arttyryp, tarıfterdi tómendetýge yqpal etetinin atap ótti. «Atalmysh tehnologııanyń ereksheligi – keń jolaqty mobıldi ınternet jyldamdyǵy 3G tehnologııasyna qaraǵanda ondaǵan ese artyq. Bul – búgingi kúni óte mańyzdy. Sebebi, Qazaqstan halqy jaqsy ınternet paıdalanýǵa úırenip alǵan. Olar jyldamdyqtyń odan da joǵary bolǵanyn qalaıdy», dedi A.Jumaǵalıev. Sondaı-aq, ol sońǵy jyldary elimizde uıaly baılanys salasynda oryn alǵan oń ózgeristerge toqtaldy. «Qyzmet baǵasy birneshe ese arzandady, lımıtsiz tarıfter usynyla bastady, ınterkonnekt mólsherlemesi 40-45 paıyzǵa tómendedi, sekýndtyq tarıfteýge tolyq kóshtik, 3G jáne 4G baılanys qyzmetteri engizildi. Naryqqa tórtinshi GSM-operatorynyń kelýi baılanys salasyndaǵy mańyzdy oqıǵalardyń biri. Al myna jańa jeli atalǵan saladaǵy básekelestiktiń artýyna, qyzmet sapasynyń jaqsarýyna, tarıftiń tómendeýine yqpal etedi», dedi agenttik basshysy. Sonymen qatar, kelesi jyly baılanys operatoryn aýystyrý kezinde telefon nómirin ózgertpeýge múmkindik beretin jańa qyzmet synaqtan ótkiziletini aıtyldy. Jańa qyzmetti iske qosý «Aqparattyq Qazaqstan – 2020» baǵdarlamasyna engizilgen. Bul qyzmet mobıldi baılanys naryǵyndaǵy básekelestikti damytýǵa kezekti ret yqpal etpek.
«Abonenttiń telefon nómirin aýystyrmaı kelesi bir operatorǵa aýysa alatynyn eskersek, kompanııalar arasynda klıent úshin talastyń kúsheıe túsetini belgili. Bul kezde tarıf mólsheri men qyzmet sapasyna basymdyq beriletin bolady», deıdi A. Jumaǵalıev. Atap aıtqanda, vedomstvo tarapynan 2014 jyly Astana men Almaty qalalarynda uıaly baılanys jelileriniń qoljetimdiligine, daýys dybystarynyń berilý sapasyna kezekti ret taldaý jumystary júrgizilýde. «Taldaý nátıjesine sáıkes, baılanys operatorlaryna bazalyq stansııalardyń sanyn kóbeıtý, usynylyp otyrǵan qyzmet sapasyn jaqsartý, jelilerdi retke keltirý sekildi óz usynystarymyzdy beretin bolamyz. Buǵan qosa, «Ákimshilik quqyq buzýshylyq týraly Qazaqstan Respýblıkasy Kodeksiniń jańa redaksııasy jobasyna paıdalanýshylarǵa baılanys qyzmetin usynyp otyrǵan baılanys operatorlaryn jaýapkershilikke tartatyn norma engizdik. Joǵaryda aıtyp ótken sharalardyń barlyǵy baılanys salasynyń damýyna oń áser etedi degen senimdemin», dep túıdi agenttik tóraǵasy.
Al «ALTEL» AQ basqarma tóraǵasy Maqsut Saýranbekovtiń aıtýy boıynsha, jańa operatordyń basty artyqshylyǵynyń biri jetekshi utqyr operatorlardyń álemdik tájirıbesi negizinde ázirlengen biregeı tarıftik josparlar toptamasyn usynýy bolmaq. «ALTEL tarıfteri túbegeıli tyń usynys bolyp tabylady, biz bonýs retinde jeli ishinde daýys qyzmetterin tegin usyna otyryp, ınternetke qatynaýǵa ǵana tólem jasaýdy usynamyz», dedi M.Saýranbekov.
Ozyq tehnologııalar men jabdyqtarǵa negizdelgen mýltıtehnologııalyq jeli birqatar ınnovasııalyq fýnksııalar men ázirlemelerdi paıdalaný múmkindigin usynady. Osylaısha, ALTEL GSM/UMTS jelisi jumys isteıtin aımaqtarda abonentterge «HD-voice» tehnologııasy qoljetimdi bolyp otyr. Tehnıkalyq jaǵynan alǵanda salynǵan jeli VoLTE tehnologııasy boıynsha LTE ústeme daýys qyzmetterin usyný jáne LTE Advanced 4-shi býyn jelileri damýynyń kelesi qadamyn iske asyrý úshin daıyndalǵan.
О́zderińizge belgili, ALTEL – «Qazaqtelekom» AQ enshiles kompanııasy. Ol Qazaqstan aýmaǵynda 1994 jyly birinshi bolyp utqyr baılanys qyzmetin kórsetýdi bastaǵan. Iá, bul – alǵashqy ulttyq uıaly baılanys operatory.
Qazaqstandaǵy tuńǵysh uıaly telefondar osy jeli arqyly baılanysqa shyqqan bolatyn. ALTEL derekter berý jelisi «Qazaqtelekom» AQ optıkalyq jelisine negizdelgen jáne IP tehnologııasymen salynǵan tirek jelini paıdalanady. Bul jeli syıymdylyǵy men derekter berý jyldamdyǵy turǵysynan aıtarlyqtaı artyqshylyqtar beredi.
4G LTE GSM jelisin iske qosý saltanatynda «Qazaqtelekom» AQ basqarma tóraǵasy Qýanyshbek Esekeev te qatysyp, kompanııa jumysyna sáttilik tiledi. Ol eki operatordyń yqpaldasqan qyzmeti jaıly aıta kele, «bul degenimiz utqyr jáne tirkelgen bıznes múmkindikterin biriktirý, ol konvergentti ónimderdi, onyń ishinde Quadroplay naryqqa shyǵarýǵa múmkindik beredi», dep atap kórsetti.Halyqqa jańa qyzmet túrlerin kórsetetin ýaqyt kelip jetti. Bizdiń kompanııa bul naryqta kóshbasshylar qatarynan kórinedi dep úmittenemiz. Bul – biz úshin úlken qadam», dedi «Qazaqtelekom» AQ basqarma tóraǵasy Q.Esekeev.
«ALTEL» AQ ótken jyly elimizdiń Aqtaý, Aqtóbe, Atyraý, Qaraǵandy, О́skemen jáne Shymkent qalalarynda qamtý aýmaǵyn keńeıtý jáne jańa býynnyń derekterdi jiberýdiń LTE 4G jelisin kommersııalyq paıdalanýǵa iske qosqan bolatyn. Al Astana jáne Almaty qalalarynda LTE 4G mobıldi jelisi 2012 jylǵy jeltoqsanda kommersııalyq paıdalanýǵa berildi, al 2013 jylǵy IV toqsanynda Almatynyń Esik, Qaskeleń, Qapshaǵaı, Talǵar, Shamalǵan sekildi kórshiles qalalarynda jáne qosymsha Almaty oblysynyń 30 eldi mekeninde qoljetimdi boldy. Munyń bári Qazaqstan Prezıdentiniń tapsyrmasyn oryndaý maqsatynda jáne Keńjolaqty derekter berýdi strategııalyq damytý baǵdarlamasyn iske asyrý aıasynda iske qosyldy.
LTE 4G degenimiz derekter berý jyldamdyǵyn 100 Mbıt/s deıingi jáne odan da joǵary dıapazonda (LTE Advance) qoldaı alatyn utqyr baılanys tehnologııasy. Bul aldyńǵy býyn jelilerinde qoljetimdi bolmaǵan múldem jańa servısterdiń jumys isteýine múmkindik beredi. LTE jelisin álemniń 100-den asa elinde 288 utqyr operator iske qosqan jáne ony paıdalanýshylardyń jalpy sany álemde 200 mln. abonentten asyp jyǵylady.
LTE 4G jaǵdaıynda jeke paıdalanýshylar úshin kóp paıdalanylatyn onlaın oıyndarǵa qatysý, sanaly sekýndtarda úlken kólemdi foto, aýdıo jáne beıne kontentti júkteý, HD formatynda suratý boıynsha fılmderdi kórý jáne taǵy basqalary qoljetimdi bolady. Memlekettik jobalar aıasynda LTE tehnologııasy joǵary jáne orta oqý oryndarynda elektrondy bilimdi, densaýlyq saqtaý, kólik jáne logıstıka salasynda jobalardy keń engizýge múmkindik beredi.
«El turǵyndary LTE jelisin kommersııalyq paıdalana bastaǵanmen birge, eń zamanaýı LTE jabdyǵy 4G USB-modemderi jáne 4G Wi-Fi roýterleri, sonymen qatar, ALTEL 4G tarıftik josparlary qoljetimdi boldy. Endi mine 4G LTE GSMjelisin ıgerip otyrmyz. Bul – úlken jetistik», deıdi «ALTEL» AQ kommersııalyq dırektory Irına Savına.
О́tkenge sál sheginis jasasaq, «ALTEL» kompanııasy 2003 jyldyń jeltoqsan aıynan bastap saýda kommersııalyq paıdalanýǵa uıaly baılanys qyzmeti men symsyz Internetke qol jetkizý múmkindigin usynýshy úshinshi býyn tehnologııasy – CDMA 2000-1H-ti iske qosqan edi. Al CDMA standarty Soltústik Amerıka, Ońtústik-Shyǵys Azııadaǵy symsyz baılanys naryǵynda basym.
«ALTEL» Qazaqstanda 3G utqyr jyldamdyqty ınternetiniń qyzmetin de birinshi bolyp iske qosty. 2010 jylǵy 29 naýryzdan bastap Internet jelisine joǵary jyldamdyqty symsyz qatynaýdy usynatyn úshinshi býynnyń tehnologııasy kommersııalyq paıdalanýyna iske qosyldy. Bul abonentterge kez kelgen ýaqytta jáne kez kelgen jerde ınternetti jeńil jáne yńǵaıly paıdalanýǵa múmkindik berdi.
Qazirgi tańda «ALTEL» kompanııasy naryqta tórt brendti usynady.
Olardyń biri – Dalacom. Bul qoldanysqa 2003 jyly 10 jeltoqsanda endi. Dalacom qyzmeti «postpaid» qaǵıdaty boıynsha usynylady. Mundaı esepteý tártibimen abonent baılanys qyzmetin nesıege alyp qoldanyp, olardy esep merziminde tóleýi múmkin. Uıaly baılanys operatory abonentke aı saıyn qoldanystaǵy tarıfterge sáıkes shot shyǵarady. Al ekinshisi – PAThWORD. Ol qoldanysqa 2004 jyly 13 aqpanda endi. Muny serpindi jáne tolyqqandy ómir súretin, isker adamdarǵa arnalǵan baılanys desek bolatyndaı. Qyzmet «prepaid» qaǵıdaty boıynsha usynylady. Osy esepteý tártibi boıynsha abonent uıaly baılanys qyzmetin operatordyń shotyna uıaly baılanys qyzmetine jetkilikti aqsha qarajaty túskennen keıin ǵana qoldana alady. Úshinshisi – City. О́z abonentterine qalalyq nómirdi qoldana otyryp uıaly baılanys qyzmetin usynatyn, Qazaqstan naryǵyna 2006 jyldyń jeltoqsan aıynda shyǵarylǵan jańa joba. City abonentteri Dalacom/PAThWORD nómirlerine, basqa uıaly baılanys operatorlarynyń nómirlerine, sonymen qatar, qalalyq nómirlerge qońyraý shala alady. Oǵan qosa, City nómirinen qalalyq telefondarǵa jáne qalalyq telefondardan City nómirine jasalǵan qońyraýlar tegin bolyp tabylady. Qyzmettiń artyqshylyǵy bolyp tabylatyny onyń jeli aımaǵynda bolǵan jaǵdaıda qalalyq qońyraýlardy únemdeý múmkindigi. Munda da qyzmet «prepaid» qaǵıdaty boıynsha usynylady. Osy esepteý tártibi boıynsha abonent uıaly baılanys qyzmetin operatordyń shotyna uıaly baılanys qyzmetine jetkilikti aqsha qarajaty túskennen keıin ǵana qoldana alady. Tórtinshisi – JET. Operatordyń qamtý jelisinde kez kelgen jerde kez kelgen ýaqytta qosylýdy qamtamasyz etetin, ınternetke joǵary jyldamdyqpen utqyr qatynaýdy biriktiretin qyzmetter jıyntyǵy.
Búginde bul tórt baılanystyń qoldanys kókjıegi keńeıip keledi. Oǵan baılanys qunynyń arzandyǵy men qyzmet sapasynyń artýy sebep bolsa kerek. Al baılanys operatorlary neǵurlym kóp abonent jınasa, solǵurlym damyp, olardyń odan ári sapaly bola túsýine múmkindigi arta bereri sózsiz. Alaıda, búginde el azamattarynyń kópshiligi ózderiniń úırenisip qalǵan baılanys túrlerinen ajyraǵysy kelmeıtinin bilemiz. Biraq, qazir básekeles zamany, tańdaý qashan da bar. Sondyqtan kez kelgen tutynýshy árkez barlyq múmkindikterdi salystyryp kórip jatsa, quba-qup bolar edi.
«ALTEL» AQ basqarma tóraǵasy Maqsut Saýranbekov 4G LTE GSM jelisin iske qosý saltanatynda sóılegen sóziniń túıininde: «ALTEL 20 jyl burynǵydaı kezekti tehnologııalyq progresti buzyp-jaryp, alǵa shyqty. Bizdiń jeli bir-birinen myńdaǵan shaqyrym alys jatqan adamdardyń dostyq qarym-qatynasyn sheksiz jalǵaıdy. Mobıldi tehnologııalardyń eń mańyzdy qyzmeti – biriktirý, dep oılaımyn. Sondyqtan biz odan ári osy baǵytta bar kúsh-jigerimizdi salamyz», degen bolatyn. Árıne, árdaıym solaı bolǵaı. Biz de otandyq kompanııanyń únemi alda bolǵanyna tilektespiz.
Dınara BITIKOVA,
«Egemen Qazaqstan».