Ortalyq saılaý komıssııasy ǵımaratynda «Jastar jáne saılaý» taqyrybynda Jas saılaýshylar klýbynyń alǵashqy otyrysy ótti.
Klýb otyrysyna respýblıkalyq jáne óńirlik jastar uıymdarynyń basshylary men belsendileri, óńirlik jastar resýrstyq ortalyqtarynyń, jastar isi jónindegi komıtetterdiń qyzmetkerleri, Astana qalasyndaǵy JOO stýdentteri, magıstranttary men doktoranttary qatysty.
Atalǵan klýb Ortalyq saılaý komıssııasynyń tóraǵasy Nurlan Ábdirovtiń bastamasymen Ortsaılaýkom janyndaǵy konsýltatıvtik-keńesshi organ retinde qurylǵanyn atap ótken jón. Negizgi maqsaty – jastardyń nazaryn saılaý prosesiniń ózekti máselelerine aýdarý, olardyń saılaý belsendiligi men quqyqtyq mádenıetin arttyrý.
Nurlan Ábdirov óz sózinde jastarmen jumys Ortalyq saılaý komıssııasy qyzmetiniń jańa baǵyty ekenin atap ótti. «Saılaý – bul óte mańyzdy quqyqtyq jáne qoǵamdyq-saıası prosess. Konstıtýsııada halyq bılikti respýblıkalyq referendým jáne erkin saılaý arqyly júzege asyrady delingen. Sondyqtan saılaýshylardyń, ásirese jastardyń saılaý mádenıetin damytý, quqyqtyq saýattylyǵy men belsendiligin arttyrý óte mańyzdy jáne qajet. Sebebi jastar – bizdiń bolashaǵymyz, Jańa Qazaqstan degenimiz bul – sizder», dedi N.Ábdirov.
Jıynda saılaý prosesiniń túrli baǵyttary boıynsha belsendi jáne qyzý pikirtalas ótti. Jas saılaýshylar ózderin qyzyqtyrǵan barlyq suraqtarǵa jaýap aldy. Qatysýshylar jastardyń quqyqtyq saýattylyǵyn jáne saılaý belsendiligin arttyrýdyń, onyń saılaý prosesine qatysýynyń mańyzdylyǵyn atap ótti.
Jastar belsendisi Oljas Súleımenov saılaýǵa jáne respýblıkalyq referendýmǵa qatysýdaǵy jeke tájirıbesimen bólisti. Elena Danılova «Saılaý mádenıeti men halyqtyń belsendiligin nyǵaıtý» jobasy týraly aıtyp berdi. Dınara Sádýakasova jastardyń elektoraldyq belsendiligin zertteýdiń jeke nátıjeleri týraly oıyn ortaǵa saldy.
Otyrysty qorytyndylaı kele, Nurlan Ábdirov Klýb qatysýshylaryn saılaý mádenıeti men jas saılaýshylardyń belsendiligin arttyrý maqsatynda odan ári yntymaqtastyq pen dıalogqa shaqyrdy. «Biz úshin saılaý prosesiniń keń aýqymdy máseleleri boıynsha sizderdiń pikirlerińiz ben usynystaryńyz óte mańyzdy. Biz osyndaı ashyq jáne syndarly formatta jumys isteýge nıettimiz», dedi Nurlan Ábdirov.