Ǵosman Tóleǵulmen dostyǵymyz ótken ǵasyrdyń 80-jyldary bastaldy. Ol – ómirde qaq-soqpen isi joq, bar oıy men maqsaty adamdarǵa adal bolsam, solarǵa jaqsylyq jasasam, kómektesip qolushyn bersem dep turatyn júregi jyly jandardyń biri.
Týǵan jerinen taban aýdarmaı eńbek etip, jyry da, syry da tek kindik qany tamǵan qasıetti Kókshe óńirimen baılanysty boldy. Talaı jaýapty qyzmetterdiń tutqasyn ustady. Qazir qadirmendi el aǵasy, Ardagerler keńesiniń tóraǵasy, Zerendi aýdanynyń qurmetti azamaty.
Ǵosman Tóleǵululy elimizde, oblys, qala kóleminde bolyp jatqan túrli ózgeristerge laıyqty baǵasyn berip, oń úderisterge úles qosý úshin óziniń kúsh-jigerin aıamaı jumsap keledi jáne qajet kezinde kózqarasy men ustanymyn batyl kórsete biletin qasıetke de ıe azamat.
Búginde kezinde belgili sebeptermen qasaqana ózgeriske ushyraǵan eldi meken, jer-sý ataýlaryn qaıta qalpyna keltirýdiń keleshek urpaq úshin mańyzy asa joǵary ekeni aıtpasa da túsinikti. Kez kelgen eldiń ótkeni men búgininiń sabaqtastyǵy jer-sý ataýlary – toponımderi arqyly kórinis tabatyny belgili. Qazaq eliniń jer-sý ataýlarynyń árbiri halyqtyń san ǵasyrlyq tarıhynan syr shertetini barshamyzǵa aıan. Osy oraıda Ǵosman Tóleǵuldyń eńbegi eren.
Atap aıtsaq, ol oblys kólemindegi 144 eldi meken men 1 717 kósheniń qaıta atalýyna muryndyq boldy. Sonyń ishinde, ásirese shoqtyǵy bıik, álemdik deńgeıdegi kýrorttyq aımaqtardyń biri bolyp tabylatyn Shýche aýdanynyń Býrabaı aýdany bolyp qaıta atalýyna kóp eńbek sińirgenin bóle-jara atap kórsetken jón. Sondaı-aq atadan balaǵa mıras bolyp daryǵan ultymyzdyń sal-serilik dástúrin ustanǵan Kókshe jerinde qaımana qazaqtyń maqtanyshy, jeztańdaı ánshi, sazger Birjan sal Qojaǵululynyń óshpes atyn jańǵyrtýǵa aıtarlyqtaı úles qosty. Sóıtip, shyǵý tegi belgisiz ári túsiniksiz Eńbekshilder aýdany Birjan sal aýdany bolyp ózgertildi.
Munyń báriniń aıtýǵa ǵana ońaı, shyn máninde, ulan-ǵaıyr eńbek pen tabandylyqty talap etetin aýqymdy sharýa ekeni anyq.
Murat qajy YDYRYSULY
Aqmola oblysy