1 qazanda Polshanyń Lıýblın qalasynda ótetin kásipqoı boks keshinde úsh sportshymyz baq synaıdy. Olar – Bekzat Nurdáýletov, Meıirim Nursultanov jáne Bekman Soılybaev.
Jartylaı aýyr salmaqtaǵy Bekzattyń áýesqoılar arasynda álem chempıony degen ataǵy bar. 24 jastaǵy Mańǵystaý oblysynyń týmasy kásipqoılar arasynda 2020 jyldan beri óner kórsetýde. Sol aralyqta ol bes jekpe-jek ótkizip, barlyǵynda jeńiske jetti. Polshada Nurdáýletov grýzııalyq Iаgo Kızırııamen (6-8, 4 KO) kúsh synasady. Orta salmaqtaǵy Meıirim – jastar arasynda Azııa chempıony, WSB dodasynyń jeńimpazy. Semeı óńirinde dúnıege kelgen 29 jastaǵy Nursultanov 2016 jyldan beri kásipqoılarmen saıysqa túsip, 17 básekeniń barlyǵynda basymdyq tanytty. Ol ózine tıesili WBO International nusqasynyń altyn belbeýin saqtap qalý úshin argentınalyq Marselo Fabıano Kaserespen (18-4, 13 KO) kezdesedi.
Al jartylaı jeńil salmaqtaǵy Bekman Soılybaev (14-1, 5 KO) Ońtústik Afrıka Respýblıkasynyń ókili Sıfosethý Mvýlmen (16-4-1, 7 KO) sheberlik baıqasady. Ol da altyn belbeý úshin talasady.